AMC awmna in sak belh a ni dawn

UDPA minister K Sapdanga chuan July 29, Thawhlehni khan Ch. Chhunga Bus Terminal, Ṭhuampuia Aizawl Municipal Corporation (AMC) in sak belhna tur lungphùm a phúm. Minister chuan, state sorkar leh municipal body-te inkarah thawh­hona ṭha a awm a ngaih pawimawh thu a sawi.

K Sapdanga chuan, AMC chu sorkar chhawm­dawltu pawimawh, ram rorelnaa ṭangkai tak a nih thu a sawi a; state sorkar leh municipal body-te inkarah thawhhona ṭha a ngaih pawimawh thu sawiin, "Inepna awm ṭhinte siam ṭha a, inlaichìnna ṭha zawk siam a nih theih nan thawhhona thuthlung ṭha tak siam a ni tawh. Municipal-ah eng party pawh sorkar se la, mipui tana ṭangkai taka thawkho zel tur kan ni," a ti.

AMC in sak belhna atan SASCI Incentive Grant cheng vbc. 50 hmuh a nih thu sawiin UDPA Minister chuan, "Sum hmuh hi hna thawh ṭhat vang a ni a, hmasawnna lawmawm tak a ni," a ti a; in sak belh tur chu thawktute nuamsa zawka an awmna tur ni loin, mipui tam zawk tana luan chhuahna tur a nih thu a sawi.

Lungphùm phùmna inkhawm hi UDPA secretary Lalmalsawma Pachuau-in a kaihruai a, Aizawl mayor Lalrinenga Sailo pawhin thu sawiin, AMC bul ṭan chhoh dan, hmalaknate leh hmachhawpte a sawi. Minister of state Prof. Lalnilawma'n a hmanpui bawk.

SASCI Part-IV (2023-24) aṭanga hmuh cheng vbc 50 hmangin AMC building chu a hma lam leh hnung lamah zauh a ni dawn a, a chung lamah chhawng thum sak belh tur a ni bawk. BM Infrastructures-in an sa dawn a, April 2025 khan work order pek tawh a ni.

Ruahman dan chuan, basement leh ground floor chu lirthei dahna atan hman a ni dawn a, 2nd floor chu shopping mall atan hman tur a ni. 3rd floor aṭanga 5th floor zawng chu pisa atan hman tur a ni a, 6th floor chu conference hall atan hman a ni ang.