District/block thawk ṭha chawimawina hlan

Planning & Programme Implementation department chuan nimin khan Synod Conference Centre-ah Sampoornata Abhiyaan - Samman Samaroh puala Mizoram pum huap aspirational district/block thawk ṭhate chawimawina an buatsaih a; minister Lalrinpuii'n hmanpuiin, aspirational district/block thawk ṭhate hnenah chawimawina a hlan.

Sampoornata Abhiyaan hi NITI Aayog-in India rama chak zawka hmasawnna a thlen theih nan district leh RD block hnufual (aspirational)-tea ngawrh lehzuala sorkar hmalakna kalpuina tura a ruahman a ni. July 1 - September 30, 2024 chhungin aspirational district leh block-ahte sorkar hmalaknate a chhawr tur leh hamṭhatna dawng turte'n an dawn kim vek theih nan ngawrh taka kalpui a ni a, hmalaknate chu tehfung parukah ṭhenin endik a ni.

Mizorama aspirational district awm chhun Mamit district chuan tehfung pathum tihhlawhtlingin, copper hlan a ni. Aspirational block pathum - Ngopa, Lungsen leh Reiek block-te zingah Ngopa RD Block-in tehfung zawng zawng hlen vekin gold a la a, Lungsen Block leh Reiek Block ten tehfung pali hlenin bronze an dawng.

Minister Lalrinpuii chuan, aspirational block leh district-a hmasawnna hnathawhte chu lawmman dawn tuma beihna a ni mai lo tih sawiin, "Nunau hrisel zawk, zirna ṭha zawk leh chhungkua leh khawtlang hmasawnna a hril tel," a ti a; district leh block-a hmasawnnate chu sorkar lama thawktu te, self help group te, kut hnathawktute leh khawtlang anga lungrual taka hmalakna rah a nih thu a sawi.

Inkhawmah hian chief secretary Khilli Ram Meena, Planning secretary Lalmalsawma Pachuau leh additional secretary Dr Lalrinchhana te pawhin thu an sawi a ni.