CM hoin Mizoram State Super Speciality Cancer & Research Centre din dan tur rêl

Chief minister Lalduhoma leh Health department hotute chuan Mizoram State Super Speciality Cancer & Research Centre din tur chungchang nimin khan CMO Conference Hall-ah an sawiho a; hna thawktu tur company ṭha leh rintlak ngei thlan a nih theih nan hmalak zui dan tur an ruahman.

Sorkar thuchhuah tarlan danin, Super Speciality Cancer & Research Centre hi Japan International Cooperation Agency (JICA) sum (loan) vbc 700 hmanga din tum a ni. Cheng vbc 700 zinga vbc 560 chu loan pûk tur a ni a, loan pung (interest rate) chu 1.5% a ni. Public Health Foundation India-in DPR an siam a, February 2023 khan sorkar laipui leh JICA ten loan agreement an ziak a, loan chu kum 2033-a rulh ṭan tur a ni.

Project hi hlawm hrang hrangah ṭhen darh a nih avangin a indawta kalpui a ngai a; project manage­ment consultant atan Mukesh & Associates - Oriental Consultants Global Co. Ltd ruat a ni a, soft component leh capacity building atan Nippon Koei India thlan a ni thung.

Mizoram hi India rama cancer tamna ber (highest incidence) a ni a, kum tin India ramah mi 1,00,000 zelah mi 98.5-in cancer an vei thar ang a nih laiin, Mizoram bikah chuan mi 1,00,000 zelah mi 189.7-in an vei thar ang a ni. Mizoramah cancer vei an tam avangin enkawl tura phai lama thawn an tam a, sorkarin sum a sêng nasa ṭhin.

India rama cancer langsar panga indawt dan chu - hnute, chawkawng, chhûl hmáwr (cervix), chuap leh esophagas a ni a; a hmasa pathum hi enfiahna (screening) atan sorkar laipuiah sum a awm. Mizorama cancer langsar panga indawt dan chu - esophagus, pumpui, chuap, hnute leh chhûl hmáwr te a ni.

Mizoramah cancer vei an tam avangin sorkarin Mizoram State Super Speciality Cancer & Research Centre din ṭulin a hria a, a hmun atan Zemabawka Mizoram State Cancer Institute awmna ram tinzawn a ni.

Super Speciality Cancer & Research Centre din tumah hian cancer hospital building, nuclear medicine block leh staff quarters ruahman a ni a; hmanraw lamah PET scan/SPECT scan, MRI 1.5 Tesla, CT ccan 128 Slices, PACS, RT-PCR/NGS leh thil dangte ruahman a ni bawk.