KHAWTHLIR

Thisen pe

Cooperative Society Registrar pisa chuan International Year of Cooperatives 2025 pualin nimin khan Cooperation pisaah thisen pek rûnpui an buatsaih a, Civil Hospital, Aizawl tan thisen unit 43 pein, petute mipa 34 leh hmeichhia pakua an ni. ṬKP, Hnahthial South Bial pawhin ṬKP Day pualin nimin khan BCM Lungleng sunday school hall-ah Christian Hospital tan thisen unit 23 an pe a, petute mipa 19 leh hmeichhia pali an ni.

END-in heroin man

Excise & Narcotics department leh Central YMA hnuaia Central Anti Drug Squad chuan nimin chhun dar 12:30 khan Champhai Ruantlangah heroin gram 350.600 (hawng 29) an man a; heroin neitua puh Lalneihkimi w/o Lalroliana, Ruantlang leh Vanlaldini (25) d/o Valalhmuna, Zimte, Myanmar, tuna Melbuka khawsa nia inchhalte an man bawk. NDPS Act, 1985 tlawhchhanin thubuai ziah luh a ni.

MCAB branch thar

Mizoram Cooperative Apex Bank, Khuangleng branch thar chu nimin khan bialtu MLA Ramthanmawia'n a hawng. MCAB Khuangleng branch hi MCAB branch 32-na a ni a, a hawnna inkhawm Khuangleng community hall-a buatsaih chu MCAB chairman Lalnunsanga'n a kaihruai a ni. Lalnunsanga chuan, Apex Bank-in branch 32 leh ATM booth 39 an neih mek thu a sawi.

Kuhva phurh khap

Serchhip district magistrate Paul L Khuma chuan thupek tichhuakin, Serchhip district-ah dan loa kuhva lak luh leh phurh khap a ni tih a puang. Thupek zâwm lote chu BNS, 2023 Section 223 hmanga hrem theih an nih thu a tarlang bawk.

MYC ṭhukhawm

Mizoram Youth Commission chu July 29, Thawhlehni khan chairman Malsawmzuala Ralte kaihhruaiin MYC conference room-ah an ṭhukhawm a; MYC coaching centre kalpui zel dan tur leh Mizo ṭhalai tam zawkin an hmang ṭangkai lehzual theih dan tur te, August 2025-a MYC Mission UPSC coaching class ṭan leh tur chungchangte sawiho a ni.

Nungcha humhalh pawimawhna inzirtir

Kawrthah Forest Division leh Kawrthah Games & Sports Association chuan July 29, Thawhlehni khan International Tiger Day pualin Kawrthah GSA khelmuala Zone Football Tournament khelh mekah ramngaw leh nungcha humhalh pawimawhna inzirtirna an buatsaih. Kawrthah DFO Karthikeyan V chuan, ṭhalaite chu nungcha humhalhna ngai pawimawha sorkar thawhpui zel turin a sáwm. Kawrthah Forest Division hi Dampa Tiger Reserve buffer zone-a awm a ni.

Deworming Day rêl

Lunglei District Level Coordination Committee for National Deworming Day chu nimin khan Lunglei additional DC Rochuangkimi Khenglawt hoin an ṭhu a, National Deworming Day (NDD) August round 2025 kalpui dan tur an rel. NDD February round-ah naupang leh tlairawl kum 1-19 inkar target 56,270 zinga 55,149 (98%) hnenah rûlhût hlo pek a nih thu leh, August round-ah target mi 56,358 an awm thu tarlan a ni.