Minister Lalrinpuii'n SSWRC a enfiah

31st July, 2025

Social Welfare, Tribal Affair, Women & Child Development minister Lalrinpuii chuan July 29, Thawhlehni khan Aizawl tlâk lam Maumual rama State Social Welfare & Rehabilitation Centre (SSWRC) a tlawh a; a dinhmun a enfiah bakah, SSWRC enkawltute leh enkawl mekte nen an inkâwm.

Minister Lalrinpuii hi SSWRC superintendent Lalnunmawii leh thawktu dangte'n SSWRC Skill Development Centre, Shakti Sadan-I, Protective Home, Alzheimer Home sak lai leh Superintendent pisate an fanpui. SSWRC-a enkawl lai, Skill Development Centre-a Computer & Publishing Centre, Beauty & Wellness, Tailoring leh Handloom section-a inzir mekte chu an dinhmun, harsatna leh hmasawnnate zawtin a sawipui a ni.

SSWRC auditorium-ah inkhawm tawi buatsaih niin, SWTA secretary Dr Lalhriatzuali Ralte-in a kaihruai a, Centre Superintendent Lalnunmawii'n an inenkawl dan, hmalakna leh hmachhawpte a sawifiah.

Lalnunmawii tarlan danin, SSWRC hi mi 50 enkawl theihna tura duan niin, mi 48 enkawl mek an ni a, hmun ruak pahnih a awm. Enkawl mek mi (puitling) 48 bakah naupang pahnih an awm bawk. Thawktu mi 24 an awm a, hmeichhia 17 leh mipa pasarih an ni.

SSWRC-a inenkawl hun chhung chu thla sarih a ni a, chumi chhung chuan an chhuah huna eizawnna an neih theih nan thiamthil chi hrang hrang zirtir an ni. SSWRC aṭanga chhuak, thiamthil an zir hmanga eizawnna ṭha tak nei thu leh nunphung pangngai zawh ta eng emaw zat an awm tawh a ni.

Minister Lalrinpuii chuan, SSWRC enkawl danin a mit a tlung hle tih sawiin, Pathian malsawm tlaka thawk zel turin a chah. Enkawl mekte fuihin, "Hmelchhiat tih loh thil dang zawng zawng chu sim theih vek a ni a, SSWRC-a awmte hi Isua'n a ngaidam thei che u, mahse, in tisual leh a remti lo," a ti a; thuawih taka awm turin a chah a ni.

Lalrinpuii chuan, ruihhloin Mizoram a tihbuai nasat thu sawiin, "Ruihhlo do hi policy pawimawh ber pakhatah kan nei a ni," a ti a; sorkarin ruihhlo do leh ruihhlo ngawlveite enkawlnaah theihtawp a chhuah mek thu a sawi.

Minister hi SWTAWCD secretary Lalzarmawii leh officer dang te, Women & Child Development director Zoramthangi Chhangte leh hotu dangte'n an ṭawiawm a ni.