CM Special Package training buatsaih; Progress partner hnenah pawisa pe nghal

Nimin khan Saitual DC conference hall-ah Bâna Kaih hnuaia Chief Ministers' Special Package orientation training buatsaih a ni a, bialtu MLA Prof. Lalnilawma, minister of state-in a hmanpui. Training zawhah ṭanpuina sumte progress partner-te bank account-ah thun nghal a ni.

Prof. Lalnilawma chuan, sorkar hmasate'n mipui hmasawnna tur policy ṭha tak tak an kalpui tawh ṭhin tih sawiin, "Sorkar thar pawhin flagship programme Bána Kaih duangin, theihtawpa ruahmannate siam chhoh a ni a, sawiselna karah tun hun kan thleng thei hi a lawmawm," a ti.

Progress partner tih chu awmze thûk tak nei a nih thu sawiin Minister chuan, "Scheme hrang hranga hamṭhatna dawngtute hi beneficiaries tih an ni ṭhin a, Handholding-ah erawh chuan hmasawnna atana thawhpui ‘progress partner’ tih an ni," a ti a; progress partner tih chuan hmasawnna atana thawhpui turin sorkarin mipui a sawm tih a tilang niin a sawi.

Prof. Lalnilawma chuan, progress partner-te'n ṭanpuina an dawnte chu a hmanna tur dik taka an hmang a ṭul thu a sawi a, "Sokarina a vil zui reng dawn. Grant in dawnte'n in mamawh zawng zawng a phuhru nghal kher lo a nih pawhin hmasawn tura ṭangkai taka in hman chuan in hlawhtlin ngei ka beisei. Harsatna vanga hlawhtling ta lo an awm a nih pawhin inhriatthiamna a awm ang a, chutihrualin theihtawp chhuah ang che u," a ti.

Orientation training hi SDO (Sadar) Lalṭhakima Chhangte-in a kaihruai a, Saitual bawrhsap Dr Lalngura Tlau pawhin thu a sawi. Saitual district-a Agriculture, Horticulture, AH&Vety, Commerce & Industries, Sericulture, LRSWC leh Fisheries department hnuaia progress partner-te chu an hmalakna tur (trade)-ah technical training neihpui an ni a; intiamkamna an ziak bawk.