Kawnpui Zotlang Ngaw chungchang sawiho

Kolasib additional DC B Malsawmtluangi hoin nimin khan sorkar hotute leh Kawnpui khawtlang hruaitute'n DC conference hall-ah community reserve atana Kawnpui Zotlang Ngaw puan tura ruahmannate an thlirho. Khawtlang hruaitute chuan, Zotlang Ngaw chu community reserve-a puan ngei an duh thu an sawi.

B Malsawmtluangi chuan, Kawnpui-I VC hnuaia Zotlang Ngaw chu community reserve-a puan tura ruahman chungchangah a neitu khawtlang hruaitute'n an remti ngei em tihchhian a ngaih thu sawi a; Zotlang Ngaw chu community reserve-a puan a nih chuan ramngaw leh a chhunga awm nungchate khauh taka humhalh a nih tawh dawn thu khawtlang hruaitute a hrilh.

Kawnpui VC-I President chuan, Zotlang Ngaw chu tun hma aṭanga khawtlangin an lo humhalh tawh ṭhin thu leh khawtlang phal loh thil tirute hrem an nih ṭhin thute a sawi a, "Ramsa leh sava chi hrang hrang an cheng a, community reserve-a puan a nih theih chuan nakin zelah pawh ecotourism lam hawiin khualzin leh mipui hîp nante hman a, khawtlang tana chhenfakawm tak a nih theih ngei kan beisei," a ti.

Ṭhutkhawmah hian Kolasib SDO (Civil), Kawnpui VC-I member te, Kawnpui Hmarveng YMA, MUP leh MHIP aiawhte an tel a; community reserve-a Zotlang Ngaw puan a nih a pawimawhna hrang hrangte an sawi. Community reserve-a puan tur ram chhunga periodic patta nei pakhat chuan a ram chu khawtlang tan a pek thu tarlan a ni.