Lunglei-in fai lawmman a dawn lawm a ni

Lunglei khawpuiin India ram puma khawpui fai inelna, Swachh Survekshan Award 2024-25-a 'Promising Swachh Shehar of Mizoram Award' a dawn chu nimin khan Lunglei Convention Centre Hall-ah lawm a ni a; Lunglei faina atana thawh hlâwk leh thawk ṭhate hnenah chawimawina hlan a ni.

Khuallian Lalzuithanga, Lunglei Municipal Council chairman chuan, Lunglei khawpuiin faina lama ram pum huap lawmman a dawng chu ropui a tih thu sawiin, "Swachh Survekshan-in a tum chu faina kawnga mi tin thâ thawhtir a nih avangin, tute emaw thawktu bik awm anga ngai lo leh tute pawl emaw thawh tur bika dah loa khua leh tui zawng zawngte ṭanhona hi a hlawhtlinna a ni," a ti.

Lalzuithanga chuan, LMC-in sum hman tur a ngah lo chungin lawmman dawng thei khawpa hmalak a nih theih chhan chu councillor leh official-te bakah, local council, tlawmngai pawl leh zirna-in hrang hrangte nena thawhhona a ṭhat vang a nih thu a sawi a; fainaah theihtawp chhuah zui zel turin Lunglei mipui a sáwm.

Inkhawm hi LMC chief executive officer Donny Lalruatsanga'n a kaihruai a, LMC vice chairman K Lalrinawma'n report a pe. Executive councillor Lalhruaitluangi Sailo kaihhruaiin fainaa thawk ṭha pawl leh mimal - LMC hnuaia sanitation worker te, Clean Lunglei leh Project Save Tlawng te, local council leh YMA branch hnuaia faina kawnga thawktu mi 37 leh mimala faina kawnga thawh hlawk mi 37-te hnenah chawimawina thuchei leh pawisa hlan a ni.