Thisen pek hi intihhmuh chi tak a ni - Cooperation Minister

Cooperation minister PC Vanlalruata chuan nimin khan Cooperative Society Registrar office-in International Year of Cooperatives, 2025 puala thisen pek rûnpui an buatsaih a hmanpui a; cooperative thil tum pawimawh tak chu mi dang tana luan chhuah a nih thu leh thisen pek chu intihhmuh chi tak a nih thu a sawi.

PC Vanlalruata chuan, UNO-in a ngaih pawimawh avangin kumin 2025 chu International Year of Cooperatives atan a puang tih a sawi a, "Thisen hi mihring nunna bul leh mi dang nena inkungkaihna thûk tak lantirtu a nih avangin thisen pek hi International Year of Cooperatives thil tum nen thil inhmeh tak a ni a, mite tana malsawmna nih theihna leh mi tam tak nun chhan theihna a nih avangin intihhmuh chi tak a ni," a ti.

Inkhawmah hian khualzahawm Amit Sharma, Cooperation secretary leh Cooperative Societies registrar John LT Sanga te pawhin thu an sawi a; Civil Hospital, Aizawl Blood Bank-a HoD Dr C Zohmingliani'n thisen pe tura pawimawhte a sawifiah.

John LT Sanga sawi danin, ṭhalai tam zawkin cooperative pawimawhna an hriat theih nan college leh university zirlaite tan, ‘Mizoram hmasawn nan cooperative Ssociety’ tih thupui hmangin essay inziahsiak buatsaih mek a ni a, lawmman ṭha tak siam a ni.