Chief Minister-in Lengpui Airport thawm ṭhat hna thawh a enfiah

Chief minister Zoram­thanga chuan nimin khan Lengpui Airport tih­changtlun hna thawh mekte a hmunah kalin a enfiah. CM hi Airports Authority of India (AAI) chuan Covid-19 do nan CM Relief Fund-a an thawh tur Rs. 10,00,000 an lo hlân nghal.

Chief Minister chuan, Covid-19 hripui léng vanga ram chhunga thlawhtheihna thlâwk tihtawp chu rem­changah lain Lengpui Airport chei ṭhat nan hman a nih thu  a sawi a, "Hun khirh­khân tak mai kan tawn mek hi a zawh hunah Mizoramin mi ram ruala hmasawnna ke a pên ve theih nan kan ram tana pawimawh em em Lengpui Airport-a hnathawh mek chhunzawm zel a ni," a ti.

Tunah hian Lengpui Airport-ah runway re­surfacing hna thawh chhun­zawm mek a nih bakah, runway chhe lai siam hna te, thlawhna leh terminal building inkara bus tlanna tur siam te, runway bula luikawr laih hnate thawh a ni.

CM Zoramthanga chuan, hmalakna kal mek bakah, Lengpui Airport châwmtu tui­khuah tihlen theih dan turte an thlithlai a, airport terminal chhunga ṭhutna dah belh te, security holding-a social distancing kalpui dan tur ruahmanna an siamte leh terminal páwna restaurant leh park siamna turte a en nghal bawk.

Chief Minister hi Civil Aviation-a principal con­sultant Wg.Cdr. J Lalhming­liana'n a ṭawiawm a ni.