Covid-19 vanga inkhârkhip laiin bawlhhlawh thliar ṭha lo an tam

Covid-19 vanga inkhârkhip a nih chhungin Aizawl Municipal  Corporation (AMC) huam chhunga bawlhhlawh paih zingah bawlhhlawh thliar ṭha lo véng an awm nual. Hun harsa lai a nih avang leh bawlhhlawh thliar ṭhat loh a tam avangin AMC chuan bawlhhlawh paihna hmun hluiah an paihtir rih.

AMC town planner Ralṭhuama Ralte chuan, "Hripui vanga kan inkhârkhip avang hian fimkhur a ngai si a, bawlhhlawh thliar thei veng an awm a, a lawmawm. A thliar thei lo pawh an awm a, mahse, kan paihtir tho," a ti a; bawlhhlawh thliar lote chu hriatthiamnain Tuiriala bawlhhlawh paihna hmun hluiah an paihtir rih thu Vanglaini palai a hrilh.

Ralṭhuama Ralte chuan, inkharkhip hmaa an kal danah leh tuna an kal danah, a hma phâk a harsat rih thu a sawi rualin, "Ni tin bawlhhlawh metric ton 159 vel a lut thla reng a, inkhârkhip hma nen a tam lam chu a inang reng. Thliar thei lo tam tak an awm nãin, kan inngaithiam rih a, inkharkhip zawhah a ngai angin kan kalpui leh ang," a ti. 

Quarantine centre-a bawlhhlawhte chu mipui bawlhhlawhte nen a hrana buaipui a nih thu sawiin Ralṭhuama chuan, "Incinerator-a hâl tur ni mah se, sorkarin a neih mai loh avangin lei kan lai khuar a, kan phûm ṭhin," a ti a; Aizawl mipui bawlhhlawh nen an dah pawlh lo a, a hranpaa an lak thu a sawi.

AMC Town Planner chuan, bawlhhlawh paihtute chu gum booth, kutkawr, hmai tuamna leh kut silfainate an pek vek thu a sawi a, "A ṭhen chuan an hmang ṭha peih chuang lo. Mahse, an himna tur kan ngai pawimawh a, tunah pawh kan hotute'n an PPE tur an siamsak mek a, theihpatawpin solid waste management lamah hian kan ṭang ve a ni," a ti.