Hnathawktute sum dawn aṭangin Pawl pakhatin Rs. 300 zel an dil

Mizoram sorkarin Covid-19 vanga tun hnaia Mizoram Building & Other Construction Workers Welfare Board (MBOCWWB) member-te hnenah mi pakhatah labour cess sum Rs. 3,000 a thunsak aṭangin hmun ṭhen­khatah chuan pawl pakhat­in member pakhatah Rs. 300 zel an dil ṭhin. Hetih lai hian, MBOCWWB Secretary chuan, April 15, 2020 khan thuchhuah siamin, beneficiary-te tan an pawisa dawn tur buaipui man tu mah pek a ngaih loh thu a tarlang.

Mizoram sorkarin MBOCWWB-a inziak lutte hnena Rs. 3,000 a pekah, sum dawngtute aṭanga Rs. 300 zel an indilna hmun chu Tuichangral tlangdung khaw hrang hrangah a ni.

Vanglaini palai zawhna chhangin Tuichangral huam chhunga khaw ṭhenkhata khawtlang hruaitute chuan, sum khawntute pawl hming an hriat loh thu an sawi a, "Anni ho hian tun hma aṭangin benificiary-te an lo buaipui tawh ṭhin a, an buaipui hah man an la ṭhin. Chutih laiin, beneficiary-te sum dawn hi chu buaipui ngai lo, direct-a an account-a lut a nih avangin tuma hnenah buaipui man pek a ngai lo. Hei hi hre loin beneficiary-te'n an lo pe mai ṭhin a ni," an ti.

Khaw pakhat VC President chuan, sum khawntute an hauh thu a sawi a; sum khawntute chuan tihluihnaa ti an nih loh thu leh a pe duh lo tan chuan pek kher a ngaih loh thua an chhân thu a sawi bawk.

Vanglaini palai zawh­na chhangin MBO­CW­­WB enkawltu La­bour, Employment, Skill Development & Entrepreneurship (LESDE) department hotute chuan, sum khawn chungchang an hriat loh thu an sawi a, "Tun hma aṭangin beneficiary-te buaipui man sum la (middle man) an awm ṭhin. Kan hriatpui ni lo mah se, buaipui man an lo inberem a nih chuan thu hran a ni. Tun ṭuma kan sum sem hi chu buaipui ngai a awm lo a, direct-in beneficiary-te account-ah kan thunsak," an ti. 

LESDE department hotute chuan, sum lo indil an awm an hlauh avangin thuchhuah an siam thu sawiin, "Sum hi hmu kim ngei se kan duh. Hetianga sum dil an awm hi a pawi khawp mai. Tun hma aṭangin middle man-te hian direct benefit transfer kan kalpui hi an hlau hle a ni," an ti a; sum dil chungchanga report a awm emaw, a finfiahna an hmuh chuan a ṭul anga hma an lak tur thu an sawi.

April 15, 2020-a labour cess sum sem chung­changa MBOCWWB thuchhuah chuan, "Heng ṭanpuina hi bank kaltlangin beneficiary-te hnenah Welfare Board-in direct transfer vekin a pe a, beneficiary-te tan buaipui man tu hnenah mah pek a ngai lo," a ti.

Hetih lai hian, Whats­App group pakhat, Labour Beneficia­ries tihah chuan mi pakhatin 'Vang­tlang, Chalráng, New Chalráng, Lungtan, Sialhâwk leh Tlangpui lamte'n an tifel vek tawh. Khawhai aṭangin pawisa thawh lo kan tam hle mai a, ngaihsak ve deuh ni se, thawh duh lo emaw kan nih erawh chuan kan inngaihsak chhunzawm lo a nih pawn sawisel awih loh ni se. April thla chhunga pawisa thawh lote chu member ni zui duh lo, hamṭhatna dang pawh dawng zui duh lo anga ngaih an ni ang,' tih a ziak/post a ni.