Synod Hospital-ah 3T MRI hawn a ni

Synod Hospital-in Magnetic Resonance Imaging (MRI) khawl an bun thar chu nimin khan Synod moderator Rev. RC Lalnghakliana'n Pathian hnenah hlanin a hawng. MRI khawl hi 3 Tesla (3T MRI) a ni a, Mizorama 3T MRI hmasa ber leh India hmarchhak biala 10-na a ni.

3T MRI khawl hi Siemens (German company) siam niin, Rs 17,50,00,000 (nuai 1,750) man a ni a, purchase order siama hauh lâwk a nih avangin Synod Hospital chuan Rs 14,80,00,000 (nuai 1,480)-in an lei. March 30, 2025 khan Synod Hospital-ah phurh thlen a ni a, khawl bunna tur hmun an siam rem hnuah nimin khan hman turin hawn a ni ta a ni.

Rev. RC Lalnghakliana chuan, Synod Hospital-ah Mizorama 3T MRI hmasa ber hawn a ni chu ropui a tih thu sawiin, "Kohhranin Pathian malsawmna kan dawng nasa em em a, Pathian fak leh chawimawi hi kan tih tur a ni. Isua Krista tihdam rawngbawlna chhunzawmtu ni zel turin theihtawp chhuahin, kan hma zâwn ṭheuha tih tur awmte hlen kan tum tur a ni," a ti a; MRI khawl chu uluk taka enkawl tur leh damlote tan biak nuam taka awm zel turin thawktute a chah.

Synod Hospital medical superintendent Dr Lalnunnemi tarlan danin, 3T MRI magnet hi lei hîpna lêt 60,000-a chak a ni a, biomatrix leh AI technology a hmang. Khawl hi centimetre 204.8-a sei, cm. 245.3-a hlai leh cm. 227.3-a sang niin, kg. 7,250-a rit a ni a; mihring kg. 250 thlenga rit an leng.

Synod Hospital-a MRI ti duh tan phone number 8731863609-ah Thawhṭanni aṭanga Inrinni thleng zing dar 9:30 leh tlai dar 4 inkarah booking tih theih a ni.