Tanker-te'n Mizoram tan tuialhthei an phur

Home minister K Sapdanga chuan, North East Petroleum Mazdoor Union (NEPMU)-in Mizorama tuialhthei phurh luh loh an tum chu an sût a, nimin khan tuialhthei phur tanker 46-in Mizo­ram tan load an lak thu leh, gas bur 8,004 phurh chhuah a nih thu a tarlang.

Nimin chawhma lam khan Home Minister chuan, "Tunah hian oil phur motor 46-in load la thar­in Mizoram an rawn lut leh tawh a, diesel litre 3,66,000, petrol litre 2,73,000 an rawn phur mek a, gas bûr 8,004 phur an rawn inzui mek bawk," a ti.

Home Minister chuan, "Load lak loh tuma thuchhuahte khan ngen­na pawmin an thu an sût leh a, Kham­rang chhehvela kawng siam­ṭhat hna thawh dan a hmuna hmu­tute'n innawrh khum chi-ah an ngai lo niin a lang. ZDU, Truck Driver Association leh Tanker Driver Asso­ciation ten nawrh tumte an thlâwp lo a, a lawmawm e," a ti bawk.

NEPMU hian July 29, 2025 khan Indian Oil Corporation (IOC) Chief General Manager hnenah lehkha thawnin, Mizoram kawng chhia avangin August 1, 2025 aṭangin Mizoramah tuialhthei phurh an tum loh thu ziakin an hrilh.

NEPMU lehkha copy hi July 30 khan social media hrang hrangah a darh a, hei vang hian Mizorama mi tam tak an chî-âi a, filling station hrang hrangah tuialhthei lak tum an intlar thui hle. Tuialhthei lak tum an tam avangin filling station tam tak chuan nimin khan mipui nawlpuia hralh (free sale) tur tuialhthei an nei lo a ni.