Myanmar raltlan chhinchhiahna Biometric enrolment tih ṭan a ni

Nimin khan Mizoram district hrang hrangah ram dang aṭanga sahimna zawnga Mizorama rawn lutte chhinchhiahna, biometric enrolment tih ṭan a ni.

Raltlan biometric enrolment hi sorkar laipui thuchhuak anga tih a ni a, tun ṭumah hian Myanmar aṭanga rawn lutte buaipui phawt a ni. Raltlante chu an awmna hmun/khuaah kal chilh an ni a, an mit nautê thla lak a ni.

Hnahthial district-ah chuan nimin khan raltlan awm tamna ber Thingsai khuaah biometric enrolment tih a ni a, a tah tawlin khaw dangah pawh kalpui chhunzawm zel a ni ang. Hnahthial District Level Committee on Displaced Person chuan Biometric Enrollment of Displaced Person buaipuitu tur nodal officer atan Hnahthial SDPO a ruat a ni.

Hnahthial DC Office chhinchhiah danin, Hnahthial district-ah hian khaw 20-ah raltlan mi 701 an awm a, puitling 436 (mipa 198 leh hmeichhia 238) leh naupang (kum 18 tling lo) 265 an ni. Relief camp-ah mi eng emaw zat an awm laiin, in luaha awm ṭhahnem tak an awm bawk. Raltlan 701 zinga mi 230 chu Thingsai khuaah an awm.