Zoram Medical College -ah mi 21 sample endik
Zoram Medical College (ZMC) Covid-19 Testing Laboratory-ah nimin khan mi 21-te swab sample endik a ni a, nimin vêk khan result a chhuah hman beisei ni mah se, he thu ziah lai thlengin hriat hman a ni lo.
ZMC-State Referral Hospital Covid-19 Bulletin nimin tlaia tihchhuaha tarlan danin, nimina swab sample 21 endikte hi Vairengte aṭanga lakte a ni. Hetih lai hian, niminah Covid-19 kai rinhlelh State Referral Hospital-a dah luh thar an awm lo a; Covid-19 vei vanga ICU-a enkawl mek chuan ni tin hma a sawn zel a, oxygen pawh a mamawh khát viau tawh a ni.
State dang aṭanga Mizoram lut turte enfiahna screening point hrang hranga duty turin nimin zing khan ZMC-a senior resident doctor pakua chu an chhuak a; Kanhmun, Khawkâwn leh Vairengte-ahte an duty ang.
Mizoram sorkar thuchhuah tarlan danin, Thawhlehni tlai dar 5 leh nimin tlai dar 5 inkarah screening point hrang hrangah Mizorama lut tur mi 560 enfiah an ni a, chu'ngte nen chuan enfiah tawh zawng zawng chu mi 72,208 an ni.
Sorkar ruahman quarantine facility-a dah thar an awm lo a, Mizoram puma swab sample endik tura lak tawh zat chu mi 179 an ni a, result hriat tawh chinah mi pakhat chiah Covid-19 vei a la awm a ni.