KHAWTHLIR

Ṭhelrêt ṭiak sem

Mamit District Level Committee on Chief Minister Rubber Mission chu additional DC Malsawmzuala kaihhruaiin nimin khan an ṭhukhawm. Mamit district-ah CM Rubber Mission thawh khatna atan chhungkaw 844 hnenah ram hectare 844-a zaua phun tur ṭhelrêt ṭiak sem mek a nih thu leh, a thawh hnihna atan hectare 436-a hma la tur chhungkaw 436 thlan a nih thu tarlan a ni.

Vawiinah power pe thei dawn lo

Vawiin hian Power & Electricity department-in 33Kv Circuit Breaker an thlak dawn a, hna an thawh dawn avang hian vawiin chawhma dar 10 aṭanga tlai dar 5 inkarah Durtlang Leitan leh Nausel inkarah kawlphetha pek a ni dawn lo.

Corporator-in rângva hlân

AMC corporator Christina Roluahpuii Sailo chuan nimin khan a bial chhunga Muma Middle School, Armed Veng South hnenah sikul chung rangva pawp thawm ṭhatna tur rangva bundle 24 a hlan. Rangva hi bialtu MLA B Lalchhanzova'n MLA fund aṭanga a pek a ni.

Frontline staff 5 Chawimawina hlan

Kawrthah Forest Division chuan nimin khan World Rangers Day pualin natural heritage humhalhnaa thawh hlâwk leh thawkrim frontline staff mi panga hnenah chawimawina an hlan. Kawrthah DFO Karthikeyan V chuan, Mizorama ramngaw venghimtu forest ranger-te leh forest guard-te chungah lawmthu a sawi a, ṭhahnemngai taka thawk chhunzawm zel turin a fuih.

Safai Apnao Bimaari Campaign

UDPA department hmalaknaa Sihfa, Rulchawm leh Keifang Venglai village council leh children sanitation club-te buatsaih fainaa hmalakna, Safai Apnao Bimaari Campaign chu nimin khan Rulchawma Kaphranga Auditorium-ah khâr a ni. Saitual SDO (Sadar) Lalṭhakima Chhangte-in a hmanpui a; VC, village level sanitation committee leh self help group-te hnenah certificate of appreciation a hlan.