Mizoramah sipai aṭanga chàwl tawh Sainik-a inziak lut mi 6,355 an awm

Home minister K Sapdanga chuan, Home department hnuaia hna lak a awm leh hunah sipai báng (ex-servicemen) a tam thei ang ber an luh theih nan an inbuatsaih thu a sawi. Mizoramah sipai bâng Sainik-a inziak lut 6,355 leh sipai thite nupui inziak lut 2,550 an awm mek.

July 30, Nilaini khan Sainik Welfare & Resettlement directorate-ah review meeting neih a ni a, Home Minister-in a hmanpui. Minister chuan, sipai bángte invawng, taima leh training ṭha tak nei tawhte an nih avangin ram venhim bakah, khawtlang tan mi ṭangkai leh chhawrtlak an nih thu a sawi a, "Sorkarah lut se rinawm tak leh ṭha taka hna thawktu an ni dawn a, Home department hnuaia hna lak a awm leh hunah ex-servicemen a tam thei ang ber an luh theih nan kan inbuatsaih," a ti.

K Sapdanga chuan, Sainik directorate chu Home department hnuaia pêng hrang hrang a tlawh kual tawpna a nih thu sawiin, "Kan lawmna leh harsatnate inhrilh tawna thawhhona ṭha tak neih hi a pawimawh a ni," a ti a; Sainik Welfare & Resettlement chu sipai bángte enkawltu a nih angin sipai bangte'n chhawmdawlna leh hamṭhatna an dawnna kawngah theihtawp chhuahpui zel a tum thu a sawi.

Sainik director Lt.Surg.Cdr Lalnuntluanga tarlan danin, Mizoramah sipai bâng inziak lut (registered ex-servicemen) 6,355 leh sipai thite nupui (registered widow) 2,550 an awm mek a; Sainik Welfare & Resttlement chuan Aizawl, Lunglei, Champhai leh Kolasib-ahte district office an nei. Sainik office atan mimal in luahna district-ahte office sak dan tur sawiho nghal a ni.

Integrated Sainik Rest House/Complex sak ṭhatna tur leh War Memorial thar din turin hmalak mek a ni a, sorkar hmalaknain ex-servicemen leh an chhungte’n (dependent) a thlawna computer an zir theihna tur Sainik Computer Training Centre chu kum 2003 khan hawn niin, mi 389 an zir chhuak tawh.

Ex-servicemen-te hian group B (non-gazette) chin post hrang hrangah reservation an nei a; sorkarin ex-servicemen-te tan hamṭhatna a siamte chu dawng an awm nual rualin, lehkha pawimawh (document) neih kim loh vanga dawng thei lo an awm ṭhin bawk.

Ṭhutkhawmah hian Home secretary Vanlalmawia pawhin thu a sawi a ni.