CM's Special Package chungchang inzirtir; Thla 2 hnuah hmalak dan endik ṭan dawn

Lunglei leh Champhaiah nimin khan Bána Kaih (Handholding) scheme hnuaia Chief Minister's Special Package ṭanpuina dawng tur progress partner-te tan orientation training buatsaih a ni a, MLA-te'n an hmanpui. CM Special Package ṭanpuina sem aṭanga thla hnih hnuah ṭanpuina dawngtute hmalak dan endik ṭan a ni dawn.

Lungleia orientation training chu BCM Hall, Serkawnah buatsaih a ni a, Lunglei West bialtu MLA T Lalhlimpuia'n a hmanpui. MLA chuan, Handholding hnuaia ṭanpuina dawngtute chu 'hmasawnna tura thawhpui' (progress partner) tih an nih thu sawiin, "Progress partner thlannaah chhungkhat leh party induhsakna a awm lo a, sorkarin department kutah engkim a dah. Progress partner atana thlante chu hma la tak tak tur leh thawhpui tlaka ngaih, tih tur leh mawhphurhna lian tak nei an ni," a ti.

CM's Special Package hnuaiah hian Lunglei district-ah progress partner 362 an awm a; Commerce & Industries department hnuaiah mi 130, Horticulture hnuaiah mi 78, AH&Vety hnuaiah mi 77, Fisheries hnuaiah mi 46, Agriculture & Farmers Welfare hnuaiah mi 14, LRSWC hnuaiah mi 13, Tourism leh Sericulture hnuaiah mi pahnih ve ve a ni.

Orientation training zawhah progress partner-te chu certificate leh an huan/dawra tàr tur thuziak pek a ni a; an bank account-ah nimin khan ṭanpuina sum thun ṭan nghal a ni. Ṭanpuina pek aṭanga thla hnih aṭangin ṭanpuina dawngtute hmalak dan department official-te'n a hmunah kalin an endik ṭan dawn a, hmalak dan leh hmasawn dante an vil zui ang.

Champhai South bialtu MLA Lt. Col. Clement Lalhmingthanga hoin IPR Auditorium-ah orientation training neih a ni a; sorkar department hotute leh progress partner-te an tel.

Lt. Col. Clement Lalhmingthanga chuan, CM Special Package chu mipui tana siam a nih thu sawiin, "Mahni inchawikàn theihna tur a ni. Sorkar hi mi tin ta a ni a, sorkar tichak tur chuan mahni intihchak a ngai. Department hotute pawh progress partner-te nen ṭha takin thawkho u la, Champhai district hming timawitu nih tum ang che u," a ti a; scheme aṭangin dinhmun sang zawka inhlan kai zel tum turin a chah.

Champhai district-ah hian CM's Special Package progress partner 96 an awm a; Commerce & Industry leh Fisheries department hnuaiah mi 28 ve ve, AH&Vety hnuaiah mi 26, Agriculture hnuaiah mi pakua, LRSWC leh Sericulture hnuaiah mi pahnih ve ve leh, UDPA department hnuaiah mi pakhat an ni.