MCAB-in a thlawnin lirthei tlantir

Nimin July 31 kha Mizoram Cooperative Apex Bank din champha a ni a, din champha lawm nan Apex Bank chuan nimin khan Aizawlah mipui tan a thlawnin city bus 20 an tlantir a, district dangah auto rickshaw leh two wheeler taxi-te a thlawnin an tlantir thung.

Apex Bank hian an din champha pual hian Aizawlah chuan Zemabawk leh Ngaizel inkarah city bus 16 a thlawnin an tlantir a, Ramrikawn leh Sihphir lamah city bus pahnih ve ve an tlantir bawk.

Nimin khan Apex Bank branch zawng zawngin an hnena leng lutte thingpui leh a hmeh an hlui a, branch ṭhenkhat chuan home leh hnuchham-in te tlawhin ṭanpuina an pe a ni.

Mizoram Cooperative Apex Bank hi December 15, 1978-ah RCS-ah ziah luh a ni a, RBI aṭanga bank din phalna neih a nih hnuah July 31, 1982 khan Dawrpuiah bank din niin, a hun laia chief minister Brig. T Sailo-in a hawng.