CM leh Raiways hotute'n chhim lama rêl kawng siam zel dan tur an sawiho

Chief minister Lalduhoma chuan nimin khan a pisaah Northeast Frontier Railways general manager (Construction) AK Chaudhary leh a thawhpuite an inkâwm. Mizoram chhim lama rêl kawng kal zel tur leh Railways kaihhnawih thil dangte sawi a ni a; CM chuan Thenzawl hnaihah rêl kawng kaltir turin a chah.

CM Lalduhoma chuan, Thenzawl chu Peace City atana siam tum a nih thu leh master plan siam ṭan mai tawh tur thu sawiin, Mizoram chhim lama rêl kawng kal zel turin Thenzawl Peace City din tur aṭanga hla vak loah paltlang thei se, rel chawlhhmun pawh hla lutuk loah awm se a duh thu a sawi a; hei hi preliminary survey-ah ngai pawimawh turin NRF hotute a chah a ni.

AK Chaudhary chuan, Thenzawl khaw kianga rel kaltir an tum dan preliminary survey report chu October 2025 vela hriattir hman a tum tur thu Chief Minister a hrilh.

Inkawmnaah hian Prime Minister-in Sairang rêl chawlhhmun a hawn dawn chuan inbuatsaih a ngaih thu te, hawnna hmun tur te, Hortoki leh Mualkhang rêl chawlhhmun a tlawhna atana helicopter ṭumna tur siam lâwk te, rel kawng a endikna atana special coach buatsaih a ṭul dawn thute sawi a ni. A rang lama inbuatsaih turin CM-in NRF General Manager a chah a, NRF hmalaknate August 19, 2025-a enho leh turin an dah.

AK Chaudhary chuan, rêl kawng leh chawlhhmunte chu hawn theiha peih a nih tawh thu a sawi rualin, Sairangah Secondary Maintenance Facility Centre for Coaches an sak leh mek a, chu chuan thla khat leh a chanve vel a awh dawn thu a sawi a, an sak zawh hun sorkar laipui lamin an ngaihchàn leh mai theih thu a sawi a ni.

Union Railways Minister-in Chief Minister hnena a lo sawi tawh angin, Sairang rêl chawlhhmun 'world class'-a siam zui dan tur leh a rang lama Rajdhani Express tlantir dan turte inkawmnaah hian sawiho a ni bawk.