Zirlai tharte lawmna hun hmang

Zirtiri Residential Science College chuan nimin khan Vanapa Hall-ah zirlai tharte lawmna leh zirlai chhuak turte thlahna hun an hmang a; adviser to Chief Minister TBC Lalvenchhunga, MLA-in a hmanpui.

TBC Lalvenchhunga chuan, zirlaite chu an thil zirte ṭha taka thiam bakah, mi dang nena khawsakho dan thiam turin a chah a, "Kan zirlai kan thiam ringawt hi dam khawchhuahna atan a kim zo lo a, eizawnna kawng hrang hrang thawh hunah mi dang zeizia hrethiam tak chunga thawk thei tura intah hriam a ngai," a ti a; auditorium thar an neih theih nan theihtawp chhuahpui a tum thu a sawi.

Principal Dr Zirlianngura tarlan danin, Zirtiri RSC-ah hian zirtirtu 69, office staff 23 leh zirlai 714 an awm mek a; Mizoram University exam hnuhnung berah subject topper panga leh top 10-a tling mi 34 an nei a, NAAC grade A an nei mek a ni.