Mizoramah thisen unit 1,131 pek a ni

15th February, 2020

Nimin khan Mizoram district hrang hrangah Valentine's Day pualin Association for Voluntary Blood Donation (AVBD), Mizoram State AIDS Control Society (MSACS) leh blood bank-te ṭangrualin thisen pek rûnpui an huaihawt a, Mizoram pumah mi 1,131-in thisen an pe.

Thisen pek rûnpui programme lian ber chu Aizawla Dawrpui Multipurpose Hall-ah buatsaih a ni a, Aizawl Municipal Corporation (AMC) mayor PC Lalhmingthanga'n a hmanpui. He hunah hian mi 443-in Aizawl Civil Hospital tan thisen an pe a, a petute mipa 309 leh hmeichhia 134 an ni.

PC Lalhmingthanga chuan, Pathian thu-ah thisen chu nunna a nih thu a chuang tih sawiin, "A ṭhian tana miin a nun a pek a liama hlu a awm lo. Thisen pek hi hmangaihna kan lantir theihna sang ber a ni a, tlawmngaihna sang ber a ni, a tih ngam hial a ni. Thisen pek aia thilpek hlu a awm chuang lo. Thisen petute an hlu tak zet a, nunna chhanhimtu a ni a, tlawmngaihna tàwp an lantir a ni," a ti.

AMC Mayor chuan, Valentine's Day-ah a ṭha zawnga hmalakna a awm chu lawmawm a tih thu sawiin, "Hetiang ní-a thisen pekte hi a ṭha záwnga hman dan remchang ṭha em em a ni a, kan duh takte nena thisen pek dunte hi kan inhmangaihna lantir dan ṭha tak a ni," a ti a; Mizoram chu thisen pekah India rama a ti ṭha pawl an ni tih a sawi rualin, hmasawnna tur tam tak a la awm a, Mizo ṭhalaite chu ṭang zel turin a sáwm.

AVBD president C Lalnunnema chuan, Valentine's Day-a thisen pek chu kum 2010-ah tihṭan a nih thu leh kum 2015

aṭangin district dangah pawh neih ṭhin a nih thu sawiin, kum 2010 aṭanga 2019 inkarah Valentine's Day pualin thisen unit 6,211 pek a nih tawh thu a sawi.

C Lalnunnema chuan, sorkar kum kal mek 2019-2020 chhunga April 2019 - January 2020 inkarah thisen unit 25,337 pek a ni tawh thu sawiin, "Chu'ng zinga unit 22,780 (89.91%) chu voluntary donation a ni. Sorkar kum kal mekah hian voluntary donation-a kan target chu 90% a ni a, hei hi kan tlin theih a beiseiawm," a ti.

AVBD chuan thuchhuah siamin, thisen petute zawng zawng leh donation camp huaihawt a nih theihna atana sum petute zawng zawng chungah lawmthu an sawi tih an tarlang.