Inkharkhip laiin zu bilh ṭín 9,549 man
Coronavirus disease (Covid-19) laka invènna atana Mizorama inkhàrkhip ṭan hma ní, March 22, 2020-a Janata Curfew aṭanga April 28 thleng khan Excise & Narcotics department (END) chuan zu bilh lai ṭîn 9,539 leh zu kaihhnawihah mi 34 an man.
END Public Relations Officer (PRO) tarlan danin, END chuan an station tinah dan loa rakzu siamna hmun te, zu leh ruihhlo dangte dap beihpui an thlâk ṭhin a, tun dinhmunah Mizoramah zu a váng rih. An department bika hma an lak bakah, hmun hrang hrangah local task force duty-te nen zu, ruihhlo leh dan bawhchhiate an man ṭhin bawk.
END enforcement-te chuan April 28, Thawhlehni khan Phunchawngah rakzu siamna hmun eng emaw zat an tichhia a ni. Inkharkhip laia rakzu an siamte chu tih dan phung loa siam a nih avangin mihring taksain a haw zual tih tarlangin, "Hetiang zu tlanchhia hi hmu kan awm a nih pawhin in lo turin kan inchah a ni," an ti.
END chuan, zu leh ruihhlo dona kawnga hma an lâk mek laiin, ramri venhimnaah sorkarin a ruat angin theihtawpin hma an la tih an sawi a; an thâ tichak tur leh hmanrua leh thil danga ṭangpuitu pawl leh mimalte chungah lawmthu an sawi bawk.
March 22 - April 28 chhunga END mante
Rakzu- litre 1901.605
Zu bilh lai- ṭín 9,539
Zu siamna bél- 254
Zu siamna hmun tihchhiat zat- 44
Dawidim- kg. 7.95
IMFL (sap zu)- ûm 19
BEDC (Burma zu)- litre 2.8
Heroin- gram 197.23
Dan bawhchhia- mi 35