Champhaiah Covid-19 hmalakna sawiho

Minister TJ Lalnun­tluanga hoin nimin khan Champhai District Task Force (DLTF) chu DC conference hall-ah an ṭhu a; Champhai district-a Covid-19 darh zel tur vênna atana hmalakna leh mamawhte an sawiho.

Minister chuan, Co­vid-19 donaa sorkar official, task force leh tlawm­ngai pawlte ṭha­hnemngaihna fakawm a tih thu sawiin, "Ei leh bâr leh bungraw dang châwk luh kawngah MHA order ang diak diak lo deuhin, state dinhmun thlir chungin siam rem a ni. Pathianin CM kaihhruaina hnuaiah sorkar hotu te, kohhran leh NGO-te finna min pe a, inkhàrkhip kan puang hma a, task force kan din vat avangin tun thlengin kan la him phah a ni," a ti.

TJ Lalnuntluanga hian Champhai district-a ramri depa hripui donaa hmalaknate a hmunah a tlawh a, khaw hrang hrangah buhfai ip 300 a sem. May 3, 2020 thleng inkhârkhip tur chu pawhsei a nih dawn leh dawn loh la chiang lo mah se, inlungrual taka kal zel turin sorkar official, tlawmngai pawlte leh task force-te a chah.

Transport Minister chuan, June 30 thleng lirthei document felfai lote ngaihhnathiam rih a nih tur thu leh Seling leh Champhai inkar kawngpui double lane-a siam turah Dulte thleng contractor award tihfel tawh a nih thu te, Saitual- Kawlkulh leh Khawzawl-Champhai kawng resurfacing tih tum a nih thute a sawi.

Champhai bawrhsap mawhphurhna latu Mark Lalthanliana chuan, Champhai district-ah qua­rantine centre pathum leh reserve pakhat siam a nih thu a sawi a, "DPRC, Keifangtlanga quarantine centre-ah mi pahnih an awm mek a, April 30 hian an chhuak ang. Ṭhenawm state aṭanga Champhai district mi lo haw turte nen an inbàn let thei dawn chiah a ni," a ti.

Champhai SP Rex Zarzoliana Vanchhawng chuan, tun din­hmunah border post 31-ah police 90 an duty mek thu sawiin, "An thla khat ei tur chhawp vek tawh a ni," a ti. Mipuite chu ramri kaltlanga dan loa thil ti an awm a nih chuan, social media-a thawn darh mai lo a, Police leh Excise & Narcotics hrilh hmasa zel turin a ngen.

YMA Sub-Headquarters, Champhai president VL Chama Hnamte chuan, ramri khua zawng zawngah inzár pharh vek tura hma an lak thu te, duty camp pakhatah mi 4-5 an awm tlangpui thu te, ramria YMA riahbûk 77-te chu khua aṭangin km. 5-7 vela hlá deuh vek a nih thute a sawi bawk.