Chhanzova'n Odisha Governor a kâwm
Minister of state B Lalchhanzova chuan nimin khan Odisha larsap Dr Haribabu Khambampati chu Bhubaneswar-a Raj Bhawan-ah a hmu a, Mizoram kaihhnawih thil chi hrang hrang an sawi dun.
B Lalchhanzova chuan, Dr Haribabu Khambampati chu Mizoram larsap a nih laia ṭhahnemngai taka a thawh ṭhinnaah leh, ṭhalaite hmakhua ngaia hma a lak tawhna te, Mizote'n central scheme hrang hrang an hmelhriata an hman ṭangkai theihna tura ṭan a laknate chu ropui a tih thu a hrilh a; tourism chawikân nana Mizoram chanchin leh thlalak bu a tihchhuah chu a hlut thu a sawi.
Dr Hari Babu Khambampati chuan, Mizorama a awm laia a buaipui ṭhin, zangnadawmna chungchanga harsatna awm vanga NH-06 zauh hna thawh theih loh reng chu vei ṭhin thu sawiin, "Mizoram sorkar ngenna anga Central sorkarin a la tih ngai loh, ram neitute leh Forest department-ah compensation a pe ta hi a lawmawm. Tunah chuan chak takin kawng siam hna thawh theih a nih tawh ka beisei," a ti.
Odisha Governor thurawn angin B Lalchhanzova hian World Skill Centre (WSC) a tlawh a, WSC enkawltu Odisha sorkara additional secretary Pinaki Patnaik-in WSC ṭangkaina leh ṭhalaite'n an chhawr dante a hrilhfiah. WSC hi finishing school a ni a, ITI leh polytechnic aṭanga zir chhuakte leh hna zawng laite thiamna trade chi hrang hranga an tah hriamna hmun a ni.
Minister B Lalchhan-zova hian nimin khan Odisha State Civil Supplies Cor-poration Limited (OSCSC) pisa a tlawh a, general manager K Sudarshan Chak-ravarthy nen inkawmin, Odisha leh Mizorama buhfai mipui hnena sem dan kal-phung an inhrilh tawn.
K Sudarshan Chakra-varthy chuan, Odisha state chu buhah an intodelh a, National Food Security Act hnuaia buhfai an sem turte pawh an state-a thar an lei thu a sawi.
B Lalchhanzova chuan, Odisha-a buh hûm lei, her leh hralh thlenga Revenue department te, remote sensing agency te, Agriculture department, Cooperation department leh OSCSC ten thawhona kalphung ṭha tak an neih chu Mizorama kalpui ve a nih theih dan tur la zir chian ṭhaa a rin thu a sawi a ni.