Mizoram Polytechnic ram luah man kar 4 chhunga pe turin sorkar hriattir

Mizoram Polytechnic, Lunglei ram luah man ram neitua inchhál hnenah cheng nuai 88.14 pe tura Lunglei Dstrict Court-in a lo tih tawh chu chawlhkar li chhungin High Court-ah pe turin Supreme Court-in Mizoram sorkar a hriattir.

Thu dawn danin, Mizoram Polytechnic thubuai High Court-a ngaihtuah ṭhat leh ṭhat loh tur chungchang hi July 28, 2025 khan Supreme Court chuan a ngaihtuah a, High Court-a ngaihtuah ṭhat a remti. Polytechnic ram luah man cheng nuai 88.14 chu chawlhkar li chhungin High Courta thehlut turin Mizoram sorkar hriattir thung.

Supreme Court rorel dan chuan, ram luah man cheng nuai 88.14 aṭanga 25% chu ram neitu hnena pek tur a ni a; 75% erawh chu bank-ah dah tur niin, High Court-in Lunglei District Court thutlukna a nemnghet a nih chuan bank-a a pungte nen ram neitu hnenah pek leh tur a ni.

Mizoram Polytechnic thubuaia District Court thutlukna High Court-a appeal theih hun laia appeal a nih loh chungchangah, a mawhphurtu official chhui chhuak turin Supreme Court chuan Mizoram Chief Secretary a hriattir a; ram neitu laka Mizoram Polytechnic Principal-in police-a FIR a thehluh behchhana thubuai ziah luh a titawp bawk.

Tarlan tawh angin, Lunglei District Court chuan Mizoram Polytechnic awmna ram neitu Vanlaldawngliana s/o H Sporta, Theiriat hnenah January 1, 1983 aṭanga January 31, 2022 thlenga ram luah man Rs 88,13,268 pe turin June 2025 khan Mizoram sorkar a hriattir.

Ram luah man pawisa pek hun hnuhnung chu July 21, 2025 a ni a, sorkar ukilte ngenna angin District Court chuan ṭum hnih a pawtsei tawh a, tunah hun hnuhnung ding lai chu August 4, 2025 a ni.

Hetih lai hian, Vanlaldawngliana'n ram pass a tihnun (renew) danah signature lem a awm nia hriain Mizoram Polytechnic Principal-in July 19 khan Lunglei Police Station-ah FIR an thehlut a, July 21 khan police-in thubuai ziak lutin, zanah Vanlaldawngliana an man. July 21 zanah vek Vanlaldawngliana'n Mizoram Polytechnic lakah FIR a thehlut ve nghal bawk.

Vanlaldawngliana hian Mizoram Poly-technic awmna ramah hian kum 1964-ah garden pass an nei a, kum 1976-ah periodic patta-ah an let nia thu dawn a ni. Polytechnic chu Mizoram sorkarin a din, building zawng zawng pawh state sorkarin a sak a ni thung.