KHAWTHLIR

Thisen pe

Zirtiri Residential Science College chuan Alumni Day pualin nimin khan thisen pek huaihawtin, Civil Hospital, Aizawl tan thisen unit 93 an pe a, petute mipa 72 leh hmeichhia 21 an ni.

Cabinet meeting

Nimin khan Chief Minister's Office-a Cabinet Room-ah Mizoram Council of Ministers an ṭhukhawm a, thil pawimawh tak tak an rêl. Ṭhutkhawm hi chief minister Lalduhoma'n a kaihruai a, an rorelte erawh hriat theih a ni rih lo.

Búng zár thlak dawn

Aizawl Traffic SP Ruatsanga Ralte chuan hriattibna chhuahin, Aizawl District Disaster Management Authority rêl angin August 3, Pathianni chawhma dar 10 aṭangin Bazar Bungkawn, Dawrpuia bûng zâr, mipui tana hlauhawma ngaihte thlak a ni dawn tih a tarlang. Traffic SP hian lirthei tlan dan tihdanglam a ngaih cháng a awm dawn avangin duty-te thu ngaichâng turin lirthei khalhtute a hriattir a ni.

Paper present dawn

Zirtiri Residential Science College Department of Physics-a associate professor Dr Rosangliana chuan 22nd International Conference on Dynamical Processes in Excited States of Solids-a paper present turin nizan khan USA a pan. Inkhawmpui hi August 3-8, 2025 chhungin University of North Carolina-ah neih a ni dawn a, Dr Rosangliana hian August 5-ah a paper buatsaih a sawifiah dawn a ni.

ORIS cigarette man

Assam Rifles sipaite chuan August 30, 2025 khan Champhai Venglaiah Myanmar aṭanga lak luh ORIS cigarette báwmpui 46 an man a, Champhaia Legal Metrology hnenah an hlan. Foreign cigarette an man hi cheng nuai 59.80 hu niin an tarlang.

MLA a lawm

Hrangturzo bialtu MLA Lalmuanpuia Punte chuan, a biala Biate Community Health Centre, North Vanlaiphai Community Health Centre leh East Lungdar Primary Health Centre tana MLA (LAD) fund aṭanga x-ray khawl a lei bun zawh a ni ta chu a lawm thu a tarlang.

Minister-in hmanpui

Minister of state Prof. Lalnilawma chuan July 31, Ningani khan Aijal Club-ah '33rd Installation of Office Bearers of Rotary Club of Aizawl’ a hmanpui. Prof. Lalnilawma chuan, mi dangte rawngbawlsak hna chu hna ropui berte zinga mi a nih thu sawiin, mi harsate tana Rotary Club-te an luang chhuak ṭhin chu fakawm a tih thu a sawi.

Bungrua inhlan

Khawzawl District Disaster Management Authority chairman K Vanlalṭhiana, district bawrhsap chuan nimin khan YMA Sub-Headquarters, Khawzawl hnenah chhiatna a thlena hmalakna tur bungrua chi hrang hrang a hlan. K Vanlalṭhiana chuan, Mizoramah YMA tel loin sorkar a kal tak tak thei lo tih a sawi a; Sub-Hqrs YMA president PC Rosiama pawhin bungrua an dawnte chu a nihna tur ang taka ṭangkai taka hman a nih tur thu a sawi bawk.

Patient Attendants' Shelter sawiho

Champhai District City Executive Committee chuan nimin khan district bawrhsap Mohammad Aaquib kaihhruaiin DAY-NULM hnuaia Champhai District Hospital huam chhunga Patient Attendants' Shelter sak tur chungchang an sawiho. Mohammad Aaquib chuan, ṭha taka shelter sak ṭan a nih theih nan UDPA leh Health department-te chu thawhhona ṭha nei turin a chah.