CM leh Special Secretary an inkâwm

Chief minister Lalduhoma chu nimin khan a pisaah sorkar laipui Secretariat-a special secretary KK Pathak, Task Force on Deregulation and Reduction of Compliances Burden member ni bawk nen an inkâwm.

Task Force on Deregulation and Reduction of Compliances Burden hi sorkar laipuiin Micro, Small & Medium Enterprises (MSME)-te tana awlsam zawka sorkar kaltir dan (ease of doing business) zawng tura a din a ni a; Union Cabinet Secretary chu chairman niin, central leh state sorkar kalphung siamṭhat ngaite zir a, a ṭul anga insiamrem dan tur rawttu a ni.

CM Lalduhoma chuan, Task Force hmalaknain India ram leh Mizoram tan rah ṭha a thlen a beisei thu a sawi a; ease of doing business lama ZPM sorkarin hma a lakna tlangpuite sawiin, "Kal dan ṭha zawk a awm phawt chuan a ṭul anga insiamṭha turin kan inpeih reng a ni," a ti.

KK Pathak hian July 31, Ningania Mizoram Chief Secretary nena an inkawmna leh Mizoram kalphung an zir dante Chief Minister a hrilh. Mizoram sorkar hmalakna chu a ṭha thawkhat hlea a hriat thu a sawi rualin, dan paih thâwl ngai (deregulate) tur a la awm nuala a hriat thu leh, India ramah MSME bul ṭanna leh hmasawn zelna tur remchang tam se a duh thu a sawi.

MSME hmasawnna tur chu an dah pawimawh ber thu sawiin KK Pathak chuan, "MSME hmasawnna lamah kan ṭhenawm ramte aiin kan chak lo deuh niin kan inhria a, anni lehpêl a, kan ram economy chawikan nan MSME hi chak zawka kaltir kan duh," a ti.