Dan paih/siamṭhat ngai a awm nual

Sorkar laipui hriattirna bawhzuia zirchianna aṭangin Mizoramah mipui tana awlsam zawkna tur leh sumdawnna kalpuitute tana dan khirh zualte leh, bul ṭanna thar tikhawtlai thei dante paih emaw, siamṭhat emaw tur eng emaw zat a awm.

Union Cabinet Secretariat special secretary KK Pathak, Task Force on Deregulation and Reduction of Compliances Burden member ni bawk chuan July 31, Ningani khan Secretariat conference hall-ah Mizoram sorkar hotute a kâwm. Mizoram sorkar department hrang hrang hotute chu an department ṭheuhah mipui tana thil tihawlsamna tur leh sumdawngte leh thil siamna din turte tana phalna leh pawm­puina awlsam zawk leh rang zawka tihfel a nih theih dan tur zawnga hma la turin a chah.

Ṭhutkhawmah hian Mizoram sorkarin dan paih thâwlna (deregulation) a kalpui mek chungchang bakah, phurrit tihziaawmna lam hawia state sorkarin dan hrang hrang, a bikin sumdawnna lam hawia dan a lo zamte siamṭhat dan tur sawiho a ni.

Commerce & Industries secretary Dr Lalzirmawia Chhangte chuan, sorkar laipui hriattirna angin dan leh hrai hman zel rem lo, khua leh tuite tana hun khawhralna leh harsatna thlen ṭhin angte a awm leh awm loh bakah, a awm chuan paih tura tih chungchang Mizoram sorkarin a bawhzui dante a tarlang.

Department hrang hrang hotute’n awlsam zawka sum­dawnna kalpui theihna tura dan ṭul lo awmte tihbo theih dan tur an sawiho a; clearance leh permit kalpui dan rei takte hian sumdawnna thar bul ṭanna tur a tihkhawtlai theih thu sawi niin, chung dante chu siamṭhat emaw, hluihlâwn tur emaw eng emaw zat a awm thu an sawi a ni.