Data mumal taka lak khawm rêl

Lawngtlai District Water & Sanitation Mission chu an chairman Cheemala Siva Gopal Reddy, bawrhsap hoin nimin khan an ṭhukhawm a; sikul, health sub-centre, VC in, sorkar office leh community hall-ahte tui connection pek a nih theih nan data mumal taka lak khawm an rêl.

Cheemala Siva Gopal Reddy chuan, mipui tana tui thianghlim in tur thianghlim pek leh faina lama hmasawn tura thawh chhunzawm zel chu hna hmasaa neih a ṭul thu a sawi a, "Swachh Bharat Mission (Gramin) leh Jal Jeevan Mission kaltlangin hmalakna tam tak awm mah se, a enkawl zui lamah ṭan lak a ṭul a, neitu thinlung put a pawimawh tak zet. A bikin vantlang mipuite tana siam inthiarna leh zun-inte enkawl leh vawn fai kawngah mipuite'n harh thar a hun tawh hle," a ti.

Ṭhutkhawmah hian sikul, sub-centre, VC in, sorkar office leh community hall-ahte tui connection pek a nih theih nan data mumal taka lak khawm an rêl a, scheme hrang hrang aṭanga tihhlawhtlin dan kawng dap a ni ang. Faina leh thianghlimna kawngah hmasawnna turin sorkar department hrang hrangte chu a remchan dan leh an hna a zirin thawkho zel se, an ti bawk.

Tarlan danin, Lawngtlai district-ah Jal Jeevan Mission kaltlangin in tinah tui connection pek a ni tawh. Hmunnuam Water Supply Schemes leh Combined Dumzautlang, Laitlang leh T Dumzau Water Supply Scheme-te kalpui mek a ni a, Swachh Bharat Mission Gramin hnuaiah community sanitary complex 56, community compost pit & soak pit 187 leh plastic collection centre (segregation shed) 157 sak a ni tawh bawk.