Hnahthialah sikula kalchilha vaccine pek an rel
Hnahthial District Task Force on Immu-nisation (DTFI) chuan nimin khan bawrhsap K Vanlalruati kaihhruaiin Hnahthial district-a naupangte'n hri dannna (vaccine) chi hrang hrangte kim taka an lak theih dan tur an sawiho. Sikul naupangte'n vaccine la tura sub-centre pan tawh loin, sub-centre lamin sikul an pan tawh zawk theih nan hmalak an rêl.
District immunisation officer Dr Christina Zonunmawii tarlan danin, tun dinhmunah sub-centre aṭangin naupang vaccine chi 11 pek theih a ni a, chu'ng zinga panga chu virus vaccine niin, a dang paruk chu bacteria vaccine a ni. Virus hrik pakhat, Japanese Encephalitis laka invenna erawh sorkarin a la pe chhuak lo.
Ṭhutkhawmah hian, thla tina vaccine lak ṭhin chu mipuite'n kim taka an hriat a, a hun taka an lak theih nan a lak theih dawn hunah tlangau (information centre) hmanga puan ṭhin an rêl. Sikul naupangte'n vaccine la tura sub-centre pan tawh loin, sub-centre lamin sikul an pan tawh zawk theih nan hmalak ni se, vaccine lak tur hmingte Mizo ṭawnga chiang taka puan ni thei se, an ti.
Tetanus leh diphtheria vaccine pawh kum 10-16 tana siam a awm thu tarlan a ni a; sikul naupang bakah sikul kal tawh lo (dropout)-te'n kim taka an lak theih nan Education Office record hmangin hmalak an rel. Hnahthial district-a raltlante'n vaccine an lak theih dan turte sawiho a ni bawk.