ZPM-in intuaitharna hun an hmang

Zoram Peoples' Move­ment (ZPM) chuan nimin khan Mosia Picnic Spot, Sihhmuiah intuaitharna hun an buatsaih a, speaker atan Rev. Lalchungnunga hmangin, thupui chu 'Ram rorelnaa Pathian ram tun din' tih a ni.

Rev. Lalchungnunga chuan, Mizoram politics hi a ṭobul a fuh loh vang a ni thei a, Pathian mite leh rawngbawltute telna tlak loh, bawlhhlawh báwma ngaih a ni ṭhin tih sawiin, "Pathian hi thil tê ber leh lian ber chênchilhtu, khawi kipa awm a ni a, ram rorelnaah pawh a hmun laili ber a chang tur a ni. Kristiana inchhál zingah ram rorelna kalpui duh dan inkalh tak tak kan hmu mek a ni," a ti.

Pathian ṭihtute chuan mipui mamawh leh ram hmasawnna an dah hmasa tur a nih thu sawiin Rev. Lalchungnunga chuan, "Chutiang mite chu Mizoramah pawh rorel turin mipuiin kan zawng mek a ni," a ti a; ZPM-te chu ram rorelna ṭhutthlengah an ṭhu a nih chuan nghet taka ding a, Pathian hmanrua atana inhlan phal turin a chah.

Rev. Lalchungnunga chuan, Mizoramah suah­sualna a pung zel a, bawrhsàwmna pawh a hluar zel tih sawiin, "Thihna rapthkak tak tak a thleng zing hle. Ram roreltute'n hengah hian mawh phurah inngai turin ka chah duh a ni," a ti.

Intuaitharna hun hi chhâwng hniha ṭhen a ni a, chawhma lam chu ZPM vice president Rev. Darchungnunga'n a kaihruai a, chawhnu lam chu ZPM president Lal­liansawta'n a kaihruai a ni.