Ni 2 chhungin bungraw phur 747-in Kawnpui aṭangin Aizawl lam pan

August 1, Zirtawpni zan aṭanga nimin zing dar 9 thleng khan Kawnpui aṭangin Aizawl panin bungraw phur lirthei 747 an tlan chhuak a, chu'ng zingah chuan tuialhthei phur (oil tanker) 111 leh eirawngbawlna gas phur 58 an tel.

Sorkar hotute hnen aṭanga thu dawn danin, August 1 zan aṭanga August 2, Inrinni zing dar 8:30 thleng khan Kawnpui aṭangin lirthei 321-in Aizawl lam an pan a, Khamrang aṭangin lirthei 276-in Kolasib/Assam lam an pan thung. Aizawl lam pan lirthei 321 zingah gas phur truck 19 leh tuialhthei phur tanker 79 an tel. Tanker-te chu petrol phur 26, diesel phur 34 leh phur kawp 19 a ni.

August 2, Inrinni zan aṭanga nimin zing dar 9 thleng khan Kawnpui aṭangin Aizawl lam pan tur bungraw phur lirthei 426 tlantir an ni a, chung zingah chuan gas phur 39 leh tuialhthei phur 32 an tel. Oil tanker 32-te chu petrol phur 13, diesel phur 11, phur kawp pasarih leh Aviation fuel phur pakhat an ni.

Hetih lai hian, Rengtekawnah Aizawl lam pan tur truck 74 (ke 14 nei chin chunglam vek) an la awm a, Kawnpui vela awm zat erawh hriat chian a ni lo. Assam lam pan tur truck Khamrangah 45 leh Mualkhangah 255 an awm bawk.