GST hmuh zat a tlahniam leh

Mizoram sorkarin kumin July thlaa Goods and Services Tax (GST) aṭanga chhiah a hmuh zat chu nikum July thla aiin a hniam leh a; kumin April thla aṭangin thla tin nikum aiin GST hmuh zat a hniam zawk.

GST Council-in chhiah hmuh zat August 1, 2025-a a tarlan danin, Mizoram sorkar chuan July 2025-ah GST cheng vbc. 31 a hmu a, nikum July 2024-a a hmuh zat vbc. 39 aiin a hniam zawk a, a hniam zawkna hi 21% a ni.

July 2025 khan India ram pumah GST cheng vbc. 1,95,735 hmuh a ni a, nikum July 2024-a hmuh zat vbc. 1,82,075 aiin vbc. 13,660 (7.5%)-in a tam zawk. July thlaah hian India rama state zingah Mizoram leh Manipur chiahin nikuma an hmuh zat an pha lo.

Kumin July thlaa GST hmuh zatah Mizoramin nikum a phak lohna hi 21% a nih laiin, Manipur-in nikum an phâk lohna chu 36% a ni. Hetih lai hian, hmarchhak state zinga mi Tripura chuan 41%-in an khûm thung.