KHAWTHLIR

Assembly session ko

Governor Gen.Dr Vijay Kumar Singh chuan August 27, 2025 chawhma dar 10:30-a ṭan turin Mizoram Legislative Assembly fur ṭhutkhawm (monsoon session) a ko a; sorkar ding mek 9th Mizoram State Legislative Assembly-a ṭhutkhawm vawi ngana tur a ni. Session rei zawng leh hun hman dan turte chu Speaker kaihhruai Assembly Business Advisory Committee an la rêl ang.

NHIDCL-in vbc. 50 pe

Mizorama national highway enkawltu National Highways and Infrastructure Development Corporation Limited (NHIDCL) chuan kumin fûr chhunga kawng chhe venna leh thawm ṭhatna atan cheng vbc. 50 a pe chhuak (sanction). Hemi chungchangah hian sorkar hotute aṭangin thu dawn a ni.

CADS-in mi 48 man

Central YMA hnuaia ruihhlo dotu Central Anti Drug Squad (CADS) chuan kumin July 26 aṭanga August 1 inkar khan ruihhlo kaihhnawiah mi 48 an man. CADS hian heroin (no. 4) hawng 43 leh Tictac bûr 96, alphazolum 26, ganja kg. 1.120 leh rakzu ûm 99 an man a; ruih theih thil an man kaihhnawiha mi 48 an man zinga 27 chu counselling pek an ni a, mi pali chu Excise & Narcotics hnenah an hlan a ni.

Covid-19 vei mi 15

August 2, Inrinni zing lam dinhmun angin Mizoramah Covid-19 vei mi 15 an awm a, chu'ng zinga mi pakua chu August 1, 2025-a hmuh chhuah an ni. Health department tarlan danin, Covid-19 kaihhnawihah Mizoramah swab sample 19,97,872 endik tawh niin, Covid vei 2,39,663 hmuh chhuah a ni tawh a; mi 2,38,914-te dam taka an chhuah laiin, mi 734-in an thihpui a ni.

Kawng dan tintuah

National Highway no. 154 laiha zangnadawmna la hmu lo mi 34 intel khawmna - Land Owners Association, Bairabi member-te tun hnaia inhmu khawm chuan zangnadawmna an hmuh theih loh avangin NH-154 dan an tum. Thu dawn danin, Land Owners Association, Bairabi hian August 15, 2025 thleng thuneitute nghah an rel a, chumi chhunga an hmuh loh chuan an kal zel dan tur chu an rêl leh dawn a ni.