Kawnpui-Aizawla lirthei tlan dan tur siam
Kolasib SP David H Lalthangliana chuan thupek chhuahin, Kawnpui-Sairang inkar National Highway 306 & 06 kawngpuia lirthei tlân dan tur a tarlang. Thupek zawm lote chu hrem theih an ni.
David H Lalthangliana tarlan danin, thupek NH-06 thawm ṭhat mekah chak lehzuala hna thawh a nih theihna tura siam a ni. Thupeh vanga harsatna tâwk emaw, report duh nei emaw chuan Kolasib Police Station officer in-charge phone number 7085130812/9612194615 emaw, Kawnpui Police Station O/C phone number 9366352665 emaw, Vairengte Polcice Station O/C phone number 9862786385-ahte hriattir theih a nih thu SP chuan a tarlang.
NH 306 & 06-A LIRTHEI TLAN DAN TUR
☑ August 2, 2025 zan dar 7 aṭanga August 4, 2025 zing dar 4 thleng lirthei tangkhang zawng zawng, lirthei ke 12 nei chin hnuai lam (trailer tel loin) chhuahtir a ni dawn.
☑ August 4 zing dar 4 aṭangin Aizawl pan tur HMV-te chu Vairengte, Bairabi, Saiphai leh Phaisen police check gate-ahte dan vek tur; Kawnpui thleng kal tur chu dan a ngai lo.
☑ August 4 zing dar 4-a dan hman loh lirtheite chu police picket post - Rengtekawn, Zero Point (Bairabi road) leh Kawnpuiahte dan vek a ni ang.
☑ Lirthei ke 14 nei leh a chung lamte tlan tlang phal a nih loh avangin duh thlan tur pahnih a awm:
1). An bungraw phurh tlangkawng (Kawnpui-Durtlang) aṭangin 407 leh LMV dang hmanga lak theih a ni a, Rengtekawna dingte chu Kawnpui thleng kal phalsak an ni. Bungrua an hlàn thlâk zawhah an lêt leh thei.
2). August 9, 2025 thleng an nghak thei a, chumi hnuah NH 06-ah an tlan thei ang.
☑ Lirthei lian bungrua phur tur 407 leh a tiatpui lirthei dang, Kawnpui-Durtlang kawnga tlan turte chu zan dar 10 leh a tuk zing dar 5 thleng an tlan thei. Pickup-te chu tlan hunbi a awm lo.
☑ August 7 zan dar 6 aṭangin essential commodity (POL, LPG leh buhfai) phur lirtheite chu Kawnpui-Khamrang (NH-06) kawngah chhuah leh ṭan a ni ang a, Aizawl aṭanga kalte nen tlan dan tur ruahman angin an tlan thei ang.
☑ Kawnpui-Khamrang (NH-06)-ah August 9 zan dar 10 aṭangin lirthei nawlpui tlantir ṭan a ni ang.