ASF kaihhnawihah vawk 1,21,605 thi tawh; Vawk suatah cheng nuai 1,451.915 sem tawh

Governor Gen. Dr Vijay Kumar Singh chuan nimin khan Rabj Bhavan-ah Animal Husbandry & Vetetinary department hotute a kâwm. African Swine Fever léng kaihhnawihah vawk 1,21,605 a thih tawh thu leh, vawk suat neitute hnenah zangnadawmna cheng nuai 1,451.915 sem a nih tawh thu tarlan a ni.

Inkawmnaah hian AH&Vety secretary Lalsangliana, director Dr R Zothanmawii leh hotu dangte an tel a; department hmalakna leh hmachhawpte bakah, vawk pûl hri ASF chungchang an sawiho.

AH&Vety department hotute tarlan danin, August 3, 2025 thleng khan Mizoramah ASF vangin vawk 69,411 a thi tawh a, vawk 52,194 suat a ni a, a vaiin vawk 1,21,605 a ni. ASF hian chhungkua 11,424 a nghawng a, cheng vbc. 982.16 hû vel an chán tawh anga chhût a ni.

Vawk suat neitute hnenah zangnadawmna cheng nuai 1,451.91 sem a ni tawh a, pawisate chu sorkar laipuiin Assistant to State for Control of Animal Disease aṭanga a rawn pek leh Mizoram sorkarin a tum a ni a; Mizoram DMR department kaltlangin vawk thi zangnadawmna cheng nuai 477.08 pek a ni tawh bawk.

Gen. VK Singh chuan, ASF léng vanga vawk vulhtute'n harsatna lian tak an tâwk leh mipui nunphung nasa taka a nghawng chu a vei thu sawiin, ASF vanga harsatna thlengte khuahkhirh turin department mal hmalakna a tâwk lo a, department hrang hrang leh mipui thawhhona ṭhat a ṭul thu a sawi a; harsatna leh rawtna an thlente chu a bawhzui tur thu a sawi bawk.

AH&Vety hotute chuan, Mizoram chu ASF-in a chên chilh tawh avangin khuahkhirh turin hri danna (vaccination) kalpui chu hmalak theihna awm chhun a nih thu Larsap an hrilh a; India ramah ASF vaccine a awm loh avangin vaccine siam chhuaktu Vietnam aṭanga lak luh dan ngaihtuah a ṭul thu an thlen. Sorkar laipui aṭangin sum hmuh kawngah harsatna a awm avangin zangnadawmna duh anga pek theih a nih loh thu an hrilh.

AH&Vety department hotute sawi danin, Mizoram chu disease diagnostic laboratory tihchangtlunna tur, Pandemic Fund project dawng tur thawh khatnaa state 14 zingah a tel a, NABL accreditation nei turin hmalak thuai tum a ni. Laboratory-ah hian March 2025 aṭang sample 221 endik a ni tawh a, chu'ng zinga 142 chu ASF a ni tih finfiah a ni.

ASF vanga harsatna zir chiang turin National Institute of Veterinary Epidemiology and Disease Informatics (NIVEDI) scientist/expert-te biak an ni a, September 2025-ah Mizoram an rawn tlawh beisei a ni. ASF chungchang inzirtirna zau zawka kalpui leh thu pawimawhte inhriattir zung zung dan tur te, line department dangte nena ṭanrual dan tur te, vawk thi sâwngbâwl dante sawiho a ni bawk.