Durtlang-Kawnpui inkarah 407 truck tlân hun siam

Aizawl district superintendent of police Rex Zarzoliana Vanchhawng chuan Durtlang leh Kawnpui inkar kawng siam mekah lirthei tlân dan tur a tichhuak.

Aizawl SP tarlan danin, Durtlang-Kawnpui inkar kawngah nimin aṭanga September 2, 2025 thleng 407 truck leh a tlukpui lirtheite chu zing dar 5 leh zan dar 10 inkarah tlan phal a ni lo a, zan dar 10 leh a tuk zing dar 5 inkarah tlan phal a ni.

Thupek hian lirthei LMV chin hnuai lam a huam lo a, chhiatrupna thil, kângmei leh rîkrum kaihhnawiha duty te, dan leh thupek pawimawh bika duty-te chêt velna a huam lo bawk. Thupek bawhchhiate chu dan hmanga hrem theih an ni.

Aizawl SP chuan, lirthei tlan dan ruahman thar chungchanga harsatna tâwk emaw, thu thlen tur neite tan Bawngkawn Police Station phone number 8794747292-ah biak theih a nih thu a tarlang bawk.