KHAWTHLIR
College-ah ruihhlo ṭhat lohzia inzirtir
Central YMA hmalaknain nimin khan Hrangbana College-ah ruihhlo ṭhat lohzia inzirtirna buatsaih a ni. CYMA general secretary Prof. Malsawmliana'n thu a sawi a, Mizoramah ruihhlo a tam zual thu sawiin, "Mizoram hi India rama ruihhlo khawih nasa ber zinga mi kan ni a, kan ṭhalaite zingah thihna a tam a, a bik takin mipa thi an tam em em," a ti a; ruihhlo laka fihlim turin zirlaite a chah.
Dan loa sangha mantute man an ni
August 1, 2025 tlai dar 4 vel khan Saitual district-a Tuivawl luiaa dynamo hmanga sangha mantute YMA Sub-Headquarters, Saitual hruaitute'n an man a, Fisheries department hnenah an hlan. Sorkar thuchhuah tarlan danin, dynamo hmanga sangha mantute hi Keifang mi an ni a, Fisheries department-in Fisheries Act tlawhchhanin an bawhzui a ni.
MPSC exam centre
MSU Gen.Hqrs hruaitute chuan nimin khan Mizoram Public Service Commission chairman R Lalramnghaka an hmu a, Mizorama district danga offline exam center changtlung tak din turin an ngen. MPSC Chairman hian MPSC Combined exam ṭhenkhat chu district danga sikul leh hall remchang hawha an kalpui tawh thu sawiin, a lo bawhzui tur thuin a lo chhang tih MSU chuan an tarlang.
Thawnthu insawisiak
Tourism department bultumin nimin khan thawnthu insawisiak, Storytelling Competition buatsaih a ni a, district bawrhsap Mohammad Aaquib-a'n a hmanpui. Intihsiakah hian K Lalvenpuii pakhatna niin, Vanlallawmkima Gangte chu pahnihna a ni a; an pahnih hian August 8, 2025-a Mizoram pum intihsiakah Champhai district aiawhin an tel dawn a ni.
Heroin man
Assam Rifles sipaite chuan August 3, Pathianni khan Champhai Zote-ah heroin gram 25.47 an man a, Champhaia Excise & Narcotics department hnenah an hlan chhawng. August 1, 2025 zan dar 7:45 pawh khan Assam Rifles leh Mizoram Police thawk dunin Zobawk daiah Lawngtlai lam pan tur mi pali hnen aṭangin heroin gram 341.12 an man bawk.
CM Rubber Mission
Serchhip bawrhsap Paul L Khuma hoin nimin khan Chief Minister's Rubber Mission kalpui dan tur sawiho a ni. Rubber producer society-te chu a zau ang zela neih te, LRSWC district office chu zau hruaitute lo hrilhfiaha August 2025 chhunga District Cooperative Office-ah inziak lut tura hmalak leh, ṭhelrêt thar chhuah awm mekte dik taka chhinchhiaha vawn ṭhatte an rel. CM Rubber Mission kalpuina tura thlante enho a ni a, LRSWC Director pawmpui tura thawn ni se, an ti.
Chhanchhuah hna thawh dan inzirtir
Kolasib District Quick Response Team (QRT) member mi 10-te tan nimin khan SIRDPR Extension Training Centre-ah training buatsaih a ni a; QRT Aizawl DDMA-te'n hliam tuar chhanchhuah dan zirtirin, Thingdawl School of Nursing-a thawktuten hliam enkawl dan an zirtir. Training hi Kolasib District Disaster Management Authority leh SIRDPR Extension Training Centre-te ṭang dun buatsaih a ni a, August 8, 2025 thleng a awh ang.
Thla 2 chuang Pump khâr tawh
Tlabunga filling station awm chhun chu tuialhthei phur lirthei a luh theih loh avangin kumin May thla chawhnu lam aṭang khan khâr a ni tawh. Thu dawn danin, Lunglei leh Tlabung inkara lei pahnih chu ton 10 aia rit dâwl zo loa ngaih a nih avangin tuialhthei phur lirthei tan zawh ngam loha ngaih a ni a, chuvang chuan tuialhthei litre 14,000 vel phur ṭhin oil tanker-te an tlan tlang thei lo a ni.
Mi 1 delh hlum
August 3, Pathianni chawhma dar 10:30 vel khan Saitual leh Saichal inkarah truck-in excavator a phurh tlain operator Kabir Hussain Barbhuiya (40), Silchar a delh a, ká chhawn lohin a thi. Thu dawn danin, excavator volvo hi Ngopa aṭanga Sairanga dah tur a ni a; truck-ah driver leh excavator operator an chuang a ni.