Kawng chhia siam hnatlangpui neih a ni; PWD Minister leh hotute'n an riah chilh

Kawnpui-Sairang inkara NH kawngpui chhe zual laite thawm ṭhain nimin khan hnatlangpui neih a ni a, mi ṭhahnem tak an thawk chhuak. Kawng siam mek hi PWD minister Vanlalhlana chuan riah chilhin, August 4, Thawhṭanni leh nimin khan a vil.

Thu dawn danin, Mizoram sorkar hmalaknaa nimina Kawnpui-Sairang inkar kawng chhe zual lai thawm ṭhat hnatlangpuiah hian Kawnpui, Sairang, Khamrang leh Mualkhang aṭangin mi ṭhahnem tak leh, ZPM ṭhalai mi eng emaw zat an president Jeje Lalpekhlua hoin an thawk chhuak. Kawng thawm ṭhatna atan hian lung chang ṭha an hmu thei a ni.

PWD Minister hian kawng siamnaa hmasawn dan enpui tur leh thawktute'n harsatna an neihte chinfel zung zung a nih theih nan August 4, Thawhṭanni zan khan riakin a hmunah kawng siam hnathawh a vil a; PWD engineer-in-chief H Zoramliana, chief engineer (Roads) David Sapzova leh chief engineer (Highways) Robin Lalrinawma ten an ṭawiawm.

Vanlalhlana chuan, Sairang-Kawnpui inkar kawng chu lirthei tana tlan tlâka siam vat a nih theih nan PWD leh NHIDCL-a thawk­tute'n theihtawp an chhuah thu a sawi a, "Sâwt zawka hna kalpui a nih theih nana khawtlang hruaitute inpekna leh pawl hrang hrangte ṭan­rualna a lawmawm tak zet a ni," a ti.

Mipui hnena ngenna sawiin PWD Minister chuan, "He kawng zawha lirthei khalhtu tangkhangte leh harsatna hrang hrang tâwk mekte chu kawng ṭha kan neih theih nana hmalaknate ngaichâng chunga lo dawh hram hram turin ka ngen a ni," a ti a; kawng thawm ṭhat zawh thuai a nih theih nana sorkarin lirthei tlan dan tur a ruahmante ngaih pawimawh a ṭul thu a sawi.

Kawnpui-Sairang inkar kawngpui thawm ṭhat hna hi August 9, 2025-ah zawh hman tum a ni a, hemi chhung hian sumdawnna lirthei (commercial vehicle) pawl hrang hrangte pawhin an lirtheite an tlantir rih dawn lo a ni.