AMC leh LADC inthlan atan electoral roll ennawn a ni dawn

State Election Commission (SEC) chuan Aizawl Municipal Corporation (AMC) leh Lai Autonomous District Council (LADC) inthlan awm leha hman tur electoral roll buatsaih dan tur a puang a; September 30, 2025-ah LADC electoral roll leh December 8, 2025-ah AMC electoral roll tlangzarh tum a nih thu a tarlang.

SEC chuan, AMC term kal lai chu February 16, 2026-ah a tawp dawn avang leh Mizoram Municipalities Act, 2007 Section 28(3)-in a phût angin municipal ward electoral roll thar buatsaiha peih vat a ṭul thu a tarlang a; January 1, 2026-a kum 18 tling chin (qualifying date) behchhanin electoral roll ennawn dan tur a duang.

AMC inthlan atana electoral roll ennawn turah September 24-ah draft roll tlangzarh tum a ni a, October 25 thleng ennawn nan hun hman tur niin, December 8, 2025-ah electoral roll thar tlangzarh a ni ang.

LADC term kal lai chu December 18, 2025-ah a tawp dawn thu leh, LADC (Constitution, Conduct of Business etc.) Rules, 2010 Rule 147 (1)(b)-in a phût angin inthlan buaisaih a nih hmain council constituencies/constituency electoral roll thar buatsaih leh peih vat a ṭul thu a tarlang bawk. LADC-ah hian January 1, 2025-a kum 18 tlingte thun theih a ni.

LADC inthlan atana electoral roll ennawn turah August 20-ah draft roll tlangzarh a ni dawn a; September 4 thleng ennawnna atan hun hman tur niin, September 30, 2025-ah final electoral roll tlangzarh a ni ang.