Sorkarin Lalrintluanga Sailo a râl

Mizoram sorkarin July 21, 2025-a MLA thi ta Lalrintluanga Sailo a râlna (death gratuity) chu nimin khan an inah a nupui Lalbiakṭhuami hnenah hlan a ni.

Sorkar hminga Dampa bialtu MLA râlna hun hi Luangmuala an inah hman a ni a, Assembly speaker Lalbiakzama'n kaihruaiin, minister K Sapdanga’n hunserh a hmang. Mizoram Salaries, Allowances and Pension of MLA Act, 1999 Section 16 angin Legislative Assembly-a additional secretary Lalthangmawia'n Lalrintluanga Sailo nupui Lalbiakṭhuami hnenah death gratuity Rs 15,00,000 a hlan.

Râlna inkhawmah hian deputy speaker Lalfam-kima, opposition leader Lalchhandama Ralte, BJP MLA Dr K Beichhua leh INC MLA C Ngunlianchunga ten thu an sawi bawk.

Lalrintluanga Sailo hi Zote khaw lal ṭhin Lalnguauva Sailo leh Lalhmingliani te fapa a ni a, June 13, 1960-ah Synod Hospital-ah a piang. Kum 1975-a pawl 8 a zawh hnuah kum 1976-ah MNF ramhnuai sipai a zawm a, remna thuthlung ziah thlengin a awm.

Luangmual Village Council-ah term li chhung thlan niin, term thum chu VC president a ni a; kum 2018 leh 2023-a Legislative Assembly inthlanpuiah MNF ticket-in Dampa bial aṭangin MLA atan thlan a ni.