KHAWTHLIR

IIS-ah Mizo tling

Andrew Lalchhandama s/o C Vanlaltluanga, Nursery Veng, Aizawl chu Union Public Service Commission-in Indian Information Service (IIS) result August 4, 2025-a a tihchhuahah a tling. Andrew hi Mizoram University aṭangin Mass Communication-a master degree nei a ni a, MZU-ah PhD a ti mek a, Doordarshan Kendra, Aizawlah editorial assistant a ni mek. Kum 30 chuang hnua IIS-a Mizo tling leh hmasa ber nia hriat a ni.

Thisen pe

Hrangbana College chuan nimin khan Civil Hospital, Aizawl tan thisen unit 82 an pe a, petute mipa 62 leh hmeichhia 20 an ni. Ebenezer Medical Center pawhin an din champha lawm nan August 4, Thawhṭanni khan Aizawl Civil Hospital-ah thisen unit 11 an pe a, August thla chhungin ṭum ruk la pek leh an tum bawk.

Zirtiri RSC-ah Energy Conservation Drive

Zirtiri Residential Science College Eco-Club chuan nimin khan an college-ah Energy Conservation Drive an buatsaih a. principal Dr Zirlianngura'n a hawng. Principal chuan zirlaite chu renchem taka kawlphetha hmang turin a chah a, "Classroom chhuak hnuhnung berin light, fan leh smart board-te kan off vek chuan energy renchemnaah thâ kan thawh tih hriat tur a ni," a ti. Eco-Club teacher Dr Lalsaimawia Sailo kaihhruaiin zirlaite'n kawlphetha remchem turin thu an tiam a ni.

Handloom Week

Women’s Polytechnic, Aizawl Weavers’ Service Centre (WSC) chuan August 4, Thawhṭanni khan an hmunah National Handloom Week vawi 11-na an hmang a, Commerce & Industries joint director Elizabeth Lalremthangi Hmar-in a hmanpui. Week hmannaah hian Dyeing & Printing Workshop leh Design and Quiz Competition buatsaih a ni a, Women Polytechnic zirlai ṭhahnem tak an tel a ni.

Minister-in hawng

Minister of state Prof. Lalnilawma chuan August 4, Thawhṭanni khan a bial chhunga Keifangah MLA LADS sum hmanga sak Keifang Leitan Bazar Shed a hawng. Minister chuan, phai aṭanga thlai lak luhte-ah hlo túr an hmang em tih endik hmasak a ni ngai lo tih sawiin, "Mizoram ngeia tharte hi a hrisel zawk a ni, " a ti.

Skill Development Training buatsaih

LESDE department leh Khawzawl DC office ṭang dun chuan nimin khan Khawzawl DC Auditorium-ah thing mistiri leh electrician mi 14 tan Skill Development Training Programme an buatsaih. Hun hmanpuitu Khawzawl bawrhsap K Vanlalṭhiana chuan, training-a telte chu theihtawp chhuah turin a chah. Training hi tun kar chhung neih tur a ni a, training-a telte hnenah hna thawhna tur hmanrua chi hrang hrang pek a ni ang.

Serchhipah thawnthu insawisiak

Nimin khan Serchhip DC Pisapui hall-ah Serchhip district huapa thawnthu insawisiak, Stotytelling Competition buatsaih a ni a, bawrhsap Paul L Khuma'n a hmanpui. Stotytelling Competition-ah hian mi panga an intihsiak a; Lalruattluanga pakhatna niin, Lalthanzami Chhangte pahnihna a ni a, Serchhip College zirlai ve ve an ni. Intihsiaka ti ṭhate hi August 8, 2025-a Mizoram pum huap intihsiak Aizawla neih turah Serchhip district aiawhin an tel ang.