MZU-in NAAC A+ a hmuh lawm a ni

Mizoram University chuan tun hnaia National Assessment and Accreditation Council (NAAC) A+ grade (CGPA 3.30) a hmuh chu nimin khan MZU Auditorium-ah an lawm a, Governor Gen. Dr Vijay Kumar Singh-a'n hmanpuiin, MZU e-Office portal a tlangzarh.

MZU-in NAAC A+ grade a hmu chu a lawmpui thu sawiin Governor chuan, university la naupang tak, kum 2000-a din, 2001-a kalpui ṭan chauh a ni chunga MZU-in hlawhtlinna hrang hrang a hmu leh India ram puma university ṭha zinga a tel chu chhuanawm a tih thu a sawi.

Larsap chuan, NIRF-in India rama university ṭha a thlanah top 100-ah MZU a lang pha char char leh 77-na a ni te, central university bikah 15-na a ni te chu chhuanawm a tih thu a sawi a; hmasawnna tur tam tak a la awm thu sawiin, "Tumna tak tak neia hmasawnna lian zawk kan ngaihtuah phawt chuan hlawhtlinna sang zawk kan chang thei a ni," a ti.

Gen. VK Singh chuan, MZU-ah National Education Policy 2020 leh Academic Bank of Credits ṭha taka kalpui a ni te, research publication-ah H-Index 98 a hmu leh patent 46 a nei te, MOOCs leh SWAYAM hnuaia hmarchhak state zinga online course kalpui hmasa ber a ni te, DRDO Industry-Academia Center of Excellence nei chhun a nite chu fakawm a tih thu a sawi. India ram chhung bakah, ram dang 15 aṭanga zirlai 43 lai an nei chuan MZU chu zirna ṭha tak a nih zia a lantir thu a sawi bawk.

MZU vice chancellor Prof. Dibakar Chandra Deka pawhin thu sawiin, India rama central university 56 zingah NAAC A+ grade hmu thei tlemte chauh an awm thu a sawi a; A+ grade chuan mawhphurhna tam tak a keng tel tih sawiin, A++ grade hmu tura ṭan la zel turin kal khawmte a sáwm a ni.