Fertilizer a hmanna tur ni loa hman a tam - Agriculture Secy.

Agriculture & Farmers' Welfare secretary Ramdinliani chuan August 4, Thawhṭanni khan Hnahthiala District Agriculture Office, School of Agricultural Sciences (SAS) leh Krishi Vigyan Kendra (KVK) te a tlawh a; loneitute tana siam leiṭha (fertilizer) a hmanna tur ni loa hman a tam thu a sawi.

Ramdinliani chuan, fertilizer chu loneitute tana siam a nih thu a sawi a, "Fertilizer hi a hmanna tur ni loa hman a tam em em. Fertilizer hralh chhuah ṭhenkhat chu Myanmar lamah tawlh lutin, fertilizer-a awm chemical ṭhenkhat chu methamphetamine siam nan hman ṭhin a nia hriat a ni a, Mizoram chhungah vêk rawn tawlh luh leh ṭhin a nih avangin ram tan hlauhawm tak a ni," a ti.

Fertilizer dealer-te endika vil ṭhat an ngaih thu sawiin Ramdinliani chuan, "A zuartute'n a man (rate) zat an tár em tih enfiah a, an tàr loh chuan insawifiah tura hriattirna pe zel tur," a ti a; NCORD ṭhutkhawm leh hunah fertilizer hralh chhuah dan leh an hralh chhuahnate'n an hman dan mumal taka chhui dan kawng dap turin sorkar official-te a chah.

Agriculture Secretary chuan, sorkar laipuiin Precision Agriculture kalpui a tum thu leh chumi atan chuan data dik tak neih a ṭul thu a sawi a, "Data siam chawp leh dik tawk lo lak a fuh dawn lo a, data lak khawm hmangin agriculture lamah hmalakna awmze nei leh mumal tak kalpui tum a ni," a ti.