PMMSY leh a kaihhnawih thilte inzirtir

National Cooperative Development Corporation (NCDC) hnuaia Regional Training Centre (RTC) chuan nimin khan Thangtea Hall, Champhai Kahrawtah Awareness Programme on PMMSY, FIDF & LIFIC an buatsaih a, Cooperation minister PC Vanlalruata'n a hmanpui.

Cooperation Minister chuan, sorkarin mipui hamṭhatna a ngaihtuah reng a, hamṭhatnate chu mipuiin an hriat a pawimawh thu a sawi a, "NCDC hi an hnathawh a ṭha hle a, Mizoram hian nasa zawka a hman ṭangkai theih nan hmalak mek a ni," a ti.

Pradhan Mantri Matsya Sampadya Yojana (PMMSY) chu Ministry of Fisheries, Animal Husbandry and Dairying hnuaia scheme lian tak a ni thu sawiin Minister chuan, "PMMSY scheme hian sangha tam zawk thar chhuah a tum a, sum lak luhna ṭha leh sangha hmanga eizawnna neite chawikanna pawimawh tak a ni," a ti a; Mizoramah cooperative tihtama thuam chak an ngaih thu a sawi.

PC Vanlalruata chuan, Cooperation department hmalaknate sawiin, mipuiin an hriata an hman ṭangkai ngei a duh thu a sawi a, "Cooperative society-te an inlungrualin an thawkho ṭha a, dik tak leh rinawm taka thawhhona a awm theih chuan an inchawi san ngei ka ring a ni," a ti.

Training hawnna inkhawmah hian Cooperation secretary Amit Sharma, Cooperative Societies registrar John LT Sanga leh Guwahati-a NCDC regional director Robert H Touthang te pawhin thu an sawi.

Inzirtirna hunah Champhai DCO B Lalchhanhima'n Cooperative department hnathawh leh thil tumte zirtirin, NCDC regional director Robert H Touthang-in NCDC hnathawh, Ministry of Cooperation hmalakna, LINAC Fisheries Business Incubation Centre (LIFIC) chungchang a hrilhfiah.

Champhai DFDO Lalremsangpuii'n cooperative-te tana Fisheries department hnathawh te, PMMSY leh Fish Farmer Producer Organization (FPPO)-te tana scheme awm te, Fisheries & Aquaculture Infrastructure Development Fund (FIDF) leh Pradhan Mantri Matsya Kisan Samridhi Sah-Yojana (PM-MKSSY) chungchangte a zirtir bawk.