Lawngtlai dist-ah VC/YLA hriatpuina dik lo a awm ṭhin; fimkhur turin chah

Lawngtlai district magistrate Cheemala Siva Gopal Reddy chuan hriattirna chhuahin, Lawngtlai district-a VC leh YLA-te'n certificate pawimawh dilte hnena hriatpuina lehkha an pekah dik lo taka hriatpuina lehkha siam chawp a awm ṭhin tih hmuh chhuah a nih thu a tarlang a, fimkhur turin VC leh YLA a ngen.

Cheemala Siva Gopal Reddy chuan, DC office-a tribal certificate, residential certificate, income certificate etc. dilna an dawn ṭhinah VC leh Young Lai Association hriatpuina chu a diltu turte'n form an fill-up hmaa pek chhuah ṭhin a awm tih hriat a nih thu a tarlang a, "VC leh YLA ten seal chhua hming sign-in an letterhead a blank/ruakin an pe chhuak ṭhin tih hriat a ni a, dik lo taka hriatpuina lehkha siam chawp a awm ṭhin tih hmuh chhuah a ni," a ti.

Lawngtlai district-a VC leh YLA-te chu hriatpuina lehkha an pek chhuah chungchangah fimkhur tur leh form dahkhah lohte chu sign tawh lo turin Magistrate chuan a hriattir a ni.