Mizoramah ngawr vei 1,501 an awm mek; TB veite ei tur ṭha thawhtute chawimawi an ni

Nimin khan Raj Bhavan-ah Pradhan Mantri TB Mukt Bharat Abhiyaan pualin hun hman a ni a, Governor Gen. Dr Vijay Kumar Singh-a'n hmanpuiin, ngawr (tuberculosis - TB) veite tana ei tur ṭha thawhtu (Nikshay Mitra) zinga thawh hlawkte hnenah chawimawina a hlan. Mizoramah TB vei mi 1,501 an awm mek.

Gen. VK Singh hian Food Basket Support kaltlanga TB veite ei tur ṭha peknaa thawh hlâwk pahnih - NEDFi leh Dr Laxmi Narayan hnenah chawimawina a hlan bakah, TB vei mi pali hnenah Food Basket a hlan. NEDFi-in TB vei mi 100 tana chhawmdawlna an pek tur Rs 4,90,000 cheque chu TB veite aiawhin Larsapin a dawng bawk.

Inkhawma tarlan danin, Mizoramah TB vei enkawl lai mi 1,501 an awm a, chu'ng zinga mi 117 (7.8%) chuan Food Basket chhawmdawlna an dawng. Ngawr veite tana en tur ṭha thawhtu (Nikshay Mitra) 76 awm mek.

Mizorama TB vei zinga 32.5% chu taksa mamawh chaw ṭha dawng lo anga chhût a ni a; India rama state leh union territory-te TB score siamah Mizoramin point 68 hmuin, 12-na a ni. Kum 2024 khan Mizoramah TB vei 2,306 an awm a, chung zinga mi 136 chu an thi a; TB vei zinga hlawhtlinna chu 79.50%-a chhut a nih laiin, 5% velin an thihpui anga chhût a ni.

Governor chuan, India-in kum 2025 chhung ngeiin ngawr awm lohna ram nih a tum thu sawiin, "Hei hi khawvel pum target kum 2030 aiin kum 5-in a hma. 2025-ah kum chanve kan pelh tawh avangin kumin chhung ngeiin theihtawp tak meuh chhuah tlan a ṭul a, Health department mai ni lo, kan zavaia ṭanrual a ṭul," a ti.

TB veite hmakhua ngaia theihtawp chhuahtu Health department-a thawkte leh ei tur ṭha thawhtute chhuanawm a tih thu sawiin Larsap chuan, "Mizorama TB vei enkawl mek mi 1,501 zinga 117 chauhin Food Basket Support an dawng a, a tam zawkin an la dawng lo hi a veiawm," a ti a; Food Basket hmalakna hnuaiah TB vei mi 10 tan ei tur ṭha pek a tum thu a puang.

Gen. VK Singh chuan, Mizoram chu India rama TB awm lohna state hmasa bera siam tura theihtawp chhuahpuiah Mizo mipui a sawm a; TB veite'n ei tur hrisel ṭha an dawn vek theih nan theihtawp chhuah turin kohhran, tlawmngai pawl leh mipui a ngen bawk.

Health minister Lalrinpuii pawhin thu sawiin, ngawr ûm bo turin hmabak tam tak a la awm thu a sawi a, "Khawtlang inpawh leh punkhawm nei tam kan nih avangin TB leh boruak aṭanga inkai darh theih hri lêng lakah kan fimkhur tlan a ṭul," a ti a, TB donaah Mizoram sorkarin theihtawp a chhuah mek thu a sawi.

Lalrinpuii chuam, TB enfiah leh damdawi man a thlâwn veka kalpui a nih thu sawiin, "Ei tur ṭha leina tur Rs 1,000 account-ah thun ṭhin a ni," a ti a; ngawr chu thuawihna leh ṭanrualna hmanga hneh theih a nih thu leh, damdawi-in hrang hrangte thuam chak mek zel a nih thu a sawi bawk.

Pradhan Mantri TB Mukt Bharat Abhiyaan puala hun hmanah hian Health secretary H Lalengmawia'n inlawmna thu a sawi a; state TB officer Dr. Zochhuanawmi'n ngawr awm lohna state siam tura hmalaknate leh dinhmun tlangpui a sawifiah a ni.