Serchhip district chhungah thla tin ILP endik an rêl

Serchhip district bawrhsap Paul L Khuma hoin nimin khan DC meeting hall-ah sorkar hotute leh khawtlang hruaitute'n Inner Line Permit (ILP) endik dan tur an ngaihtuah a; sorkar leh YMA ṭangkawpin tun August thla aṭangin thla tin ILP endika feh chhuah an rêl.

Ṭhutkhawmah hian, sorkar leh Serchhip Sub-Headquarters YMA ṭang dunin ILP endik rûnpui neih ṭhin ni se an ti. Endik hun leh hmun tur tarlang lâwk loa endik ṭhin te, thla tin ILP endik tura feh chhuah te, a thawh khatna atan August thla chhungin YMA branch tinah ILP endikte an rel a ni.

Tarlan danin, Serchhip police-te chuan kumin 2025 chhungin ṭum sawm ILP an endik tawh a, mi 364 an endik zingah dan bawhchhia mi 14 an hmu chhuak a; dan bawhchhiate chu hrem an ni.